عمران خان زندانونو کې د تحريک انصاف ګوند ښځينه غړو د جنسي ځورولو ادعا کړې

په پاکستان کې د سياسي ناورين پر دوام سره د دې هېواد مخکيني لومړي وزير عمران خان ادعا کړې، چې د نوموړي پر مشرۍ د تحريک انصاف ګوند هغه ښځينه غړي په زندانونو کې جنسي ځورول شوي، چې د تېرو لاريونو پرمهال د پاکستاني ځواکونو له لوري نيول شوي دي.

خان ویلي، په زندانونو کې د ښځينه فعالانو د يادو جنسي ځورونو په تړاو يې کره اسناد او شواهد ترلاسه کړي اوپه خبره یېپر جنسي ځورونې سربېره د تحريک انصاف پر يادو ښځينه فعالانو فشار راوړل کېږي، چې له سياست لرې او خپلو حقونو په اړه غږ پورته نه کړي.

خان زیاته کړې:« اوس داسې اطلاعات په تېزۍ سره ترلاسه کيږي، چې په زندانونو کې د ځينو ښځو په جنسي توګه ځورولو سره د هغوی د ځورولو لړۍ اوس هم روانه ده»

په پاکستان کې د بشري حقونو د موضوع له مطرح کېدو سره داسې انګېرل کېږي، چې دغلته روان سياسي ناورين له امله د بشري حقونو نقض زيات شوی او له همدې کبله يادې مسلې ته د يو شمېر نړيوالو بنسټونو پام ور اوښتی.

د بشري حقونو نړيوال بنست عمومي منشي جوم داګال په پاکستان کې د بشري حقونو وضعيت په اړه د اندېښنې ښودلو ترڅنګ غوښتنه کړې، چې ياد وضعيت ته دې د پای ټکی کېښودل شي.

هغه زیاته کړې:« د پاکستان په زندانونو کې د تحريک انصاف ګوند سوله‌ييزو او بې ګناه ښځينه فعالانو په اړه اندېښمن يم. د پاکستان پر حکومت غږ کوم، چې بشري حقونو ته درناوی وکړي او نيول شوې فعالانې ژر تر ژره له زندانونو خوشې کړي.»

 د سیاسي چارو شنونکي هم په پاکستان د بشري حقونو د نقض دوام اندېښمنوونکی بولي او زياتوي، چې د ياد وضعيت دوام کولی شي، پر پاکستان په نړيواله کچه بې باوري رامنځته کړي.

دوی زياتوي، پر پاکستان د بې باورۍ زياتېدو په صورت کې له دې هېواد سره د نړيوالو همکارۍ کمېږي او بلاخره به دا هېواد د يوه ناسم راتلونکي پر لور سوق شي.

د پاکستان تحريک انصاف ګوند مشر او د دې هېواد مخکيني لومړي وزير عمران خان هلته د سياسي ناورين مهارولو په موخه له حکومت سره د خبرو وړانديز کړی او په همدې موخه یې يوه ۷ کسيزه کمېټه هم ګومارلې ده.

خو  حکومت نوموړي ته د رد ځواب ورکړی او ان د لومړي وزير شهباز شريف د کابينې ځينو غړو ويلي، د خبرو په اړه د عمران خان وړانديز پر ځواب نه ارزي.