په پاکستان کې روان سياسي ناورين چې په لنډمهال کې يې د کرارېدو هيلې نشته، د دې لامل شوی، چې خلک د پوځ، ملکي حکومت او د مخکېني لومړي وزير عمران خان پر پلويانو ووېشل شي.
عمران خان په مکرره توګه ادعا کړې،چې د تحريک انصاف ګوند پر مشرانو د فشار راوړلو او له ګوند څخه يې په بېلولو سره پوځ هڅه کوي، څو نوموړی په ولسي او سياسي لحاظ کمزوری کړي.
د مالوماتو پر بنسټ له پرون راهيسې د فردوس عاشق عوان، علي زايدي او د خسرو بختيار په شمول يو شمېر مطرح کسان د عمران خان پر مشرۍ د تحريک انصاف ګوند له غړيتوب لاس پر سر شوي.
عمران خان د ناورين پيچلتيا په اړه اندېښنه ښودلې او ويلي يې دي، د ياد وضعيت دوام په پاکستان کې انارشي رامنځته کوي او وړانديز يې کړی،چې ټول مخالف لوري دې مذاکراتو ته ور وړاندې شي.
هغه زیاته کړې:« زه د خبرو لپاره وړانديز کوم. ځګه هغه څه چې اوس روان دي، دا حل لاره نه شي کېدای. دا وضعيت پاکستان انارشۍ ته وړي.»
په پاکستان کې د ناورين شدت تر دې حده دی، چې ان امريکايي سناتوران يې هم اندېښمن کړي.
د امريکا سنا مجلس د بهرنيو اړيکو کميټې مشر باب منیډیز وايي، په پاکستان کې اوسني ناورين د بشري حقونو نقض په اړه اندېښنې زياتې کړي دي.
