له هغه وروسته چې د پاکستان پوځي رژیم پر افغانستان بریدونه او تېری پیل کړ، هره ورځ یې په خپلو هوايي او راکېټي بریدونو کې عامه تاسیسات او ملکي افغانان چې ښځې او ماشومان هم په کې شامل دي، په نښه او شهیدان کړي دي.
شنونکي وايي، پاکستان د سیمې ناامنه کولو لپاره پیسې اخیستې دي او پوځ يې دې موخې ته د رسېدو لپاره په قصدي ډول عام خلک او تاسیسات په نښه کوي.
دوی زياتوي، په افغانستان کې د پاکستان پوځي رژیم له لوري د عامو خلکو په نښه کول او تېری د ټولو نړیوالو قوانینو او بشري حقونو خلاف کړنې دي او باید د مخنیوي هڅې يې وشي.
د پوهنتون استاد فیض محمد ځلاند وايي: « په دې وروستیو کې پاکستان په ډېره ناوړه او شومه بڼه پر افغانستان خپلو بریدونو ته ادامه ورکړې او په بریدونو کې یې عامو خلکو ته مرګ ژوبله اړولې. دا نه یوازې د بشري حقونو، اسلامي او ګاونډیتوب اصولو خلاف عمل دی بلکې دا یو ستر جنایت هم دی. افغانان د دې جنایت غندلو او ځواب ورکولو لپاره د خپل حکومت تر شا ولاړ دي. همدارنګه موږ ته په کار ده چې د پاکستان هرې شومې لوبې ته ځواب ورکړو.»
تحلیلوونکي په دې اند دي چې پر افغانستان د پاکستان او بیا په قصدي ډول د عامو افغانانو پر کورونو هوايي او راکېټي بریدونه په خپل ذات کې ستر جنایتونه دي.
د دوی غوښتنه دا ده چې باید نړیوال د پاکستان د دغو جنایتونو مخه ونیسي او اجازه ورنه کړي چې د عامو افغانانو د وژلو لړۍ ته دوام ورکړي.
د پوځي چارو شنونکی توریالی ځاځی وايي: « پاکستان یوه پروژه ده او جنایت کاره اجنډا لري. د پاکستان بریدونه له هر ډول بشري، اسلامي او ګاونډیتوب اصولو خلاف دي. پاکستان له تېرې نیمې پېړۍ راهیسې په افغانستان کې د بشر ضد جنایتونه ترسره کړي.»
باور دا دی چې پاکستان پر افغان خاوره له تېري سره نه یوازې دا چې د یوه مسلمان ګاونډي پر حقونو پښې اېښې دي بلکې د ګاونډيتوب ټول اصول یې هم مات کړي.
د چارو یو شمېر نور شنونکي په دې باور دي چې افغانان باید په پوره یووالي او له نظام سره په همغږۍ د پاکستان د دغو بریدونو او تېریو ځواب ورکړي.
د سیاسي چارو شنونکی کمال ناصر اصولي وايي: « په اوسني حالت کې چې کله هم پر افغانستان د پاکستان له خوا مخامخ تېری شوی یا د پاکستان د پوځ له خوا په ملکي وګړو بمبار شوی او په شهادت رسول شوي، دا نه یوازې تېری دی بلکې جنګي جنایت دی. دا جنایت باید په نړیواله کچه باید وغندل شي. باید اروپايي ټولنه، ملګري ملتونو او د بشري حقونو مدافعان په دې اړه خپل غږ پورته کړي، پر پاکستان فشار راوړي ترڅو د عامو خلکو له وژلو لاس واخلي.»
پر افغانستان د پاکستان د تېري او یرغل له پیل راهیسې د پاکستان پوځ سلګونه عام افغانان چې ښځې او ماشومان هم په کې شامل دي، شهیدان او ټپیان کړي دي. د پاکستان پوځي رژیم یوازې په تېرو ۲۴ ساعتونو کې د ډیورنډ فرضي کرښې په اوږد کې ۴ عام افغانان شهیدان کړې او ۹ یې ټپیان کړي دي.
