په افغانستان کې د جاپان سفارت د دې هېواد د نړۍوالې همکارې ادارې یا جایکا له لارې د ملګرو ملتونو د ماشومانو ملاتړ له صندوق سره ۶.۳ میلیونه ډالر مرسته وکړه.
دغه مرسته په هېواد کې د ګوزڼ ضد واکسین او د دې ویروس د خپرېدا مخنیوي په موخه کیږي، چې یونېسف ته د ګوزڼ ضد واکسین د پيل امکان برابروي او شاوخوا ۱۷ میلیونه ماشومانو تر پوښښ لاندې راوړلي.
د جاپان سفير په دې اړه د هوکړه لیک په مراسمو کې دغه مرسته په پولیو د افغان ماشومانو له اخته کېدو څخه د مخنیوي په برخه کې د خپل هېواد د هڅو دوام یادوي.
په افغانستان کې د جاپان سفیر کنیچي ماساموتو وايي: (( جاپان پرېکړه کړې چې د جاپان نړۍوالې همکارې ادارې له لارې دې پروژې ته چې د روانې میاشتې څخه د یونېسف له خوا پیلیږي څه باندې ۲۶ اعشاریه ۶ میلیونه ډالره مرسته وکړي د دې پروژې هدف د افغانستان په ټولو ولایتونو کې د منظم واکسناسیون او ملي کمپاینونو لپاره د خولې له لارې د پولیو ترسره کېدونکي واکسین څخه د بې ځنډه اکمال ډاډ تر لاسه کول دي چې په ټولنیز ډول به له ۷۰ میلیونه ډېرې نجونې او هلکان تر پوښښ لاندې راولي. ))
ملګري ملتونه بيا افغانستان او پاکستان هغه دوه هېوادونه یادوي، چې لاهم د ګوزڼ ویروس پکې د خپرېدا په حال کې دی او د مالوماتو له مخې يې، د ۲۰۲۵ز کال تر پایه يوازې په افغانستان کې د ګوزڼ لس مثبتې پېښېثبت شوي.
ياد سازمان هېواد ته د میلیونونه افغان کډوالو له بېرته راستنېدو او په ختیځ کې له مرګونو وروستیو زلزلو وروسته، چې د ګوزڼمثبتو پېښو احتمال یې لوړ کړی؛ دغه مرسته د پولیو په کابو کولو او له منځه وړلو کې موثر اقدام ګڼي.
په افغانستان کې د یونېسف استازيمرستیاله انډریا جیمز څرګندوي: (( که څه هم د پولیو په له منځه وړلو کې پرمختګ شوی؛ خو افغانستان او پاکستان په نړۍ کې هغه دوه هېوادونه دي، چې لاهم د وحشي پولیو ویروس پکې خپرېږي. په افغانستان کې د پولیو مثبتې پېښې، چې په ۲۰۲۴ز کال کې ۲۵ وې، د ۲۰۲۵ز کال تر ډيسمبر پورې لسو هغو ته راکمې شوي. خو تر هغې چې دغه ویروس په لوړ خطر لرونکو سیمو کې موجود وي، هر قضا شوی واکسین ماشومان له ګواښ سره مخولای شي او هغه تېرې لاسته راوړنې ګواښلای شي، چې موږ ورته د رسېدا لپاره ډېر هڅې کړي.))
بل پلو افغانستان کې د جاپان د نړيوالې همکارې ادارې رئيس وايي، دې ادارې له تېرو پنځو لسیزو راهیسې په هېواد کې د ساري ناروغیو پر وړاندې د مبارزې او د روغتیايي سیسټم په پیاوړي کولو کې کار کړی او د ساري ناروغیو د روغتون جوړولو او د نري رنځ ضد اقداماتو په څېر برخو کې یې هڅې روانې کړي.
د جاپان همکارې ادارې رئيس سوتا توساکا زیاتوي: (( په ننني نوې هوکړهلیک کې به جایکا له یونېسف سره د پولیو د له منځه وړلو او منظم واکسیناسیون د لاپياوړتیا په برخه کې خپلې همکارۍ ته دوام ورکړي. څو ماشومانو لپاره د واکسیناسیون باکیفیته خدمتونو ته عالانه لاسرسی ممکن شي. په افغانستان کې د پولیو له منځه وړل شونې ده. زه هیله لرم چې دا نوی نوښت به دې مهمې موخې ته د رسېدا په لار کې مرسته وکړي.))
دا په داسې حال کې ده، چې د عامې روغتیا وزارت تر دې وړاندې په افغانستان کې د ګوزڼ په له منځه وړلو کې د نړۍوالو مرستو دوام مهم یاد کړی او د يادو مرستو پر دوام يې ټینګار کړی.
