د اسلامي امارت ویاند د ملګرو ملتونو سرمنشي انټونیو ګوترېش د تېرې ورځې خبرو ته په اشارې، د نړیوالو له لوري د افغانستان په کورنیو چارو کې پر لاسوهنې نه کولو ټینګار کړی.
ذبیحالله مجاهد د حکومتي جوړښت څرنګوالی او بشري حقونه د افغانستان کورني مسایل بللي او له هېوادونو او نړیوالو سازمانونو یې غوښتي چې دا ټکی په پام کې ونیسي. مجاهد ټینګار کړی چې نړویوال دې د تحمیل او سیاسي فشارونو له لارې د خپلو غوښتنو د منلو هڅه نه کوي.
نوموړي له شمشاد سره په ځانګړې مرکه کې ویلي، اسلامي امارت د حکومتولۍ په برخه کې د هېوادونو او سازمانونو مشورې اوري، خو هغو ته په کورنیو مسایلو کې د لاسوهنې اجازه نه ورکوي.
د حکومت ویاند ذبیحالله مجاهد وايي: « اصلي موضوع دا ده چې که کومې غوښتنې له افغانستان څخه کېږي، باید د مشورې او نظر په حد کې وشي. موږ تل مشورې او نظرونه اورو، خو تحمیل او د دې غوښتنو لپاره سیاسي فشارونه راوړل، منطقي نه دي او په هېوادونو کې د مداخلې مانا لري. افغانستان غواړي د خلکو مشورې واوري، نظریات واخلي او د باتجربه هېوادونو تجربې وګوري مګر د یوې مشورې په حد کې نه د مداخلې په حد کې. که څوک د افغانستان په داخلي امورو کې مداخله کوي او په نتیجه کې یې خپلې غوښتنې تحمیل کړي، افغانان دا ډول حالت نه غواړي او اوسنی نظام هم د دې حالت مخالف دی. موږ له هېوادونو سره داسې اړیکې جوړول غواړو چې د دواړو اړخونو تعاملات عادي کړي او درناوی هم په منځ کې پاتې شي.»
مجاهد له افغانستان سره د تعامل او نشهيي توکو پر وړاندې مبارزې به برخه کې د ملګرو ملتونو د سرمنشي ورستۍ څرګندونې ستايي، خو ترڅنګ یې د ټولګډونه حکومت رامنځته کېدل، بشري حقونه او ورته نور مسایل د افغانستان کورني موضوعات بولي او په خبره یې، د حکومت بڼه او څرنګوالی به هم په کور دننه ټاکل کېږي.
ذبیح الله مجاهد دغه راز وايي، د اسلامي امارت د واضېحو او عیني پالیسیو له امله په ټول افغانستان کې سوله او ثبات یقیني شوي او نه پرېږدي چې بیاځلې سیاسي خپلسریو او امنیتي ګډوډیو ته لار هواره شي.
خو د دې خلاف د سیمې او ګاونډ په شمول نورو هېوادونو او سازمانونو هم په ځلونو په افغانستان کې د ټولګډونه حکومتي جوړښت او د بشري حقونو د رعایت غوښتنې مطرح کړې دي.
د سیاسي چارو شنونکی روحالله هوتکي وايي: « د ملګرو ملتونو چارواکي اکثریت د افغانستان په اړه پر مهمو موضوعاتو خبرې کوي، خو د ښځو او نجونو د حقونونو موضوع، د ټولشموله حکومت جوړول چې دوی یې لپاره کوم ځانګړی تعریف هم نه لري، د ترهګرۍ ضد مبارزه چې ملګرو ملتونو یې په اړه د افغانستان له حکومت سره هېڅ ډول همکاري نه ده کړې، د بشري حقونو رعایت هم هغه موضوع ده چې په اړه یې ضد او نقیض خبرې کېږي.»
حکومت بیا دغو پرله پسې اندېښنو ته په ځواب کې اوسنی حکومت ټولګډونه بولي او د اسلامي شریعت او افغاني دود او دستور سره سم یې په هېواد کې د بشري حقونو د تامین ټټر وهلی.
خو له دې ټولو سره، داسې ښکاري چې په دې اړه د اوسنیو چارواکو ډاډ نړیوالو ته د قناعت وړ نه دی او له همدې امله یې په دې اړه خپلې غوښتنې او دریځونه تکرار کړي دي.
د سیاسي چارو شنونکی معینګل څمکنی وايي: « که د حکومت اډانې ته فکر وکړو، د حکومت په اډانه کې د قومونو په تناسب هر قوم ته ونډه ورکړل شوې مګر منتقدین وايي، دا ټول د یوه صنف خلک دي. اوس ستونزه دا ده چې چارې څه ډول مخکې ځي، ایا په کور دننه امن راغلی؟ دا د حکومتونو لپاره لومړنی شرط دی. دویم، ایا عمراني چارې پرمخ ځي؟ ځواب هو دی. ایا د مخدره موادو پر ضد مبارزه شوې؟ دلته هم ځواب هو دی او ایا د ترورېزم محو کولو لپاره مبارزه شوې؟ ځواب یقینا ً هو دی.»
دا په داسې حال کې ده چې د ملګرو ملتونو سرمنشي انټونیو ګوترېش د جمعې په ورځ خبري کنفرانس ته په وینا کې که څه هم په افغانستان کې له نشهيي توکو سره د شوې مبارزې ستاینه وکړه، خو بل پلو یې د ټولګډونه حکومتي جوړښت، د بشري حقونو په ځانګړي ډول د ښځو او نجونو د زده کړو او کار او دغهراز د ترهګرۍ د پراخېدو په اړه اندېښنې شریکې کړې.
نوموړي په خپلو خبرو کې په حکومتي اډانه کې ټولشمولتیا په افغانستان کې د سولې له پیاوړتیا سره غوټه موضوع وبلله.
