په قبايلي سيمه تيرا دره کې له خپلو مېنو د ځايي اوسېدونکو د ايستلو لړۍ د روانې جنوري میاشتې په ۹مه نېټه پيل شوه او اوس چې د يادې لړۍ ختمېدو ته يوازې يوه اوونۍ پاتې ده، د پاکستان پوځ ځايي اوسېدونکو ته خبرداری ورکړی چې په يوه اوونۍ کې دننه تيرا د نظامي عملیاتو لپاره خالي کړي.
ځايي اوسېدونکي وايي، په زور له خپلو کورونو ايستل کېدو ته اړ شوي او په خبره يې، د پاکستان پوځ له دې کار سره دا خبره يقيني کوي چې پاليسۍ يې يوازې او يوازې د پښتنو پر ځپلو ولاړې دي.
د تیرا اوسېدونکی وايي: « ډېر بد حال دی، ماشومان، ښځې او بوډاګان سخت په تکلیف دي، وږي دي او ژاړي.»
له تیرا څخه خپرو شویو ویډيوګانو کې ښکاري چې د سیمې ځينو اوسېدونکو د کورونو پرېښودو او د عملياتو په اړه د پاکستان پوځ د پرېکړې غندلو لپاره په اعتراضي توګه خپلې خولې تړلې دي.
بله خوا، د خيبر پښتونخوا اعلی وزير په داسې حال کې تيرا ته تللی چې له يادې درې ځايي اوسېدونکي د پوځ له وېرې خپلې کډې باروي. نوموړي د پوځي عملياتو د مخنيوي په ځای، خلکو ته ډاډ ورکړی چې هلته د کېدونکو عملياتو مخالف دی او مخالف به وي.
د خیبر پښتونخوا اعلی وزیر سهیل افریدی وايي: « کوم نظامي عملیات چې روان دي، نه یې پرون ملګری وم، نه یې نن ملګری یم او نه به یې سبا ملګرتیا وکړم. دا عملیات د ټوپک په زور په بدمعاشۍ روان دي او د بندو دروازو تر شا یې پرېکړه شوې.»
ځينې شنونکي وړاندې په قبايلو کې د ترسره شویو عملياتو څرنګوالي ته په کتو، په تيرا کې د پاکستان پوځ تازه عمليات هلته پر شته کانونو او معدنیاتو د ولکې پر ټينګولو سربېره، په قبايلي سيمو کې د خپلو اهدافو ترلاسه کولو دسيسه بولي.
د سیاسي چارو شنونکی اخترمحمد راسخ وايي: « د پاکستان پوځ دې سیمې تخلیه کولو، پښتانه کډه کولو او د ترهګرۍ په نوم جګړې پیلولو لپاره بهانه لټوي. اصلي خبر دا ده چې له دې سیمې پښتانه کډه کوي او پنجابیان ورته راولي؛ نظامي اډې په کې جوړې او هلته پر شته معدنیاتو خېټه اچوي.»
د سیاسي چارو شنونکی شهسوار سنګروال وايي: « زه فکر کوم که چېرې دا حالت ادامه پیدا کړي، ښايي ټوله پښتونخوا کې د پاکستان د پوځ پر وړاندې پاڅونونه پيل شي.»
د پاکستان پوځ له دې وړاندې هم په قبايلي سيمو کې پراخ پوځي عمليات ترسره کړي چې د ملتپالو ګوندونو په خبره، په کې پښتانه فعال ملتپال، عام خلک او د دوی اقتصادي بنسټونه په نښه شوي.
د يادو عملياتو له ډلې په شمالي وزيرستان کې ترسره شوي ضرب غضب پوځي عملیات يې خورا خونړي بلل کېږي چې د يوه کال په دوام سره په ۲۰۱۵ کال کې پای ته ورسېدل.
