د افغانستان اسلامي امارت لوړپوړی غړی غړی انس حقاني وايي، چې اسلامي امارت د لوړې عقیدې په برکت د نړۍ زبر ځواکونو ته ماتې ورکړې او واک ته رسیدلې دی.
ده، چې په خوست کې د جامعه نورالقران دینې مدرسې د یو شمیر طالبانو فراغت غونډه کې خبرې کولې دیني علمانو ته په خطاب کې وویل، چې اوس په کار ده، هماغه عقيده چې دا بريا يې راوستې، بايد د علم له ترلاسه کولو سره يوځای وساتل شي.
د اسلامي امارت لوړپوړی غړی حافظ انس حقاني وايي: (( موږ او تاسو په خپله نظریه او عقیده باندې ډاډمن یو چې د ښې عقیدې او ښې نظریې خاوندان یو نو بیا زما او ستا مسوولیت ډېر لوړ دی، زما او ستا مسوولیت تر خپل کلي، ولسوالۍ او ولایته محدود نه دی، زه او ته باید د اسلام رېښتونی پیغام نړۍ ته هم ورسوو او هغه په علم سره رسیږي. ))
نوموړی همدا راز زیاتوي، اسلامي امارت چې د علماوو حکومت بلل کېږي، بايد له دې نسبته ناسمه ګټه پورته نه کړي.
د ده په وینا، ديني علمان بايد له خلکو سره ښه چلن وکړي، ځانونه له ولسه لوړ ونه ګڼي او د خلکو ملګري او خادمان وي. هغه د علماوو اصلي دنده د ټولنې لارښوونه، د ولس خدمت او اصلاح وبلله.
انس حقاني څرګندوي: (( د علم سره توضع ډېره مهمه ده نن سبا الحمدالله د علماوو حکومت دی، دا د الله تعالی ج یو انعام دی چې په دې ولس یې کړی دی خو د دې نسبت نه باید موږ غلطه استفاده هم ونه کړو، مسلمان ته د نفرت په نظر هم ونه ګورو او ځان په هغه لوړ هم ونه بولو. ))
اخوا د دفاع وزارت د لوی درستیز مرستیال مالي خان صدیق په دې مراسمو کې دیني علمان اړ وبلل څو د خلکو ستونزې په څرګنده توګه مسوولینو ته ورسوي او مسوولین خپلو مسوولیتونو ته متوجې کړي، چې د ولس د ستونزو ناپاملرنه د نظام د خرابوالي سبب ونه ګرځي.
د لوی درستیز مرستیال مالي خان صدیق زیاتوي: (( زه د عامو خلکو په طرف یم د دوی به بعضې مشکلات وي، خو زموږ والیان صاحبان یا زه خپله چې په دفاع وزارت کې یمه دوی په تر موږه خبره نه شي رسولی، خو دا د دغو علماوو مسوولیت دی چې دا خبره دوی ته وکړي او وزیر انو ته یې هم ورسوي او چې په موږ کې کومه غلطي وي مخامخ دې راته ووايي ځکه جهاد مې هم د علماوو په فتوا شروع کړی وو.
د اسلامي امارت یادو چارواکو په دې مراسمو کې همدا راز ټینګار وکړ علما او مسؤلین بايد خلک له دین څخه متنفر نه کړي، بلکې داسې دعوت وړاندې کړي چې د انبیاوو د وخت له اخلاقو سره تړاو ولري.
دوی د اوسني حکومت له دریځ سره سم ټینګار وکړ چې د علم په رڼا کې بايد د ولس او خاورې خدمت وشي.
