امريکا په تازه اقدام کې ملګرو ملتونو ته د بشردوستانه مرستو او فعاليتونو لپاره ۲ میليارد ډالره مرسته ورکړې، خو په دې شرط چې دا مرسته به په افغانستان او يمن کې نه لګوي.
د بهرنیو مرستو، بشري چارو او مذهبي ازادۍ په برخه کې د امريکا بهرنیو چارو وزارت مرستیال د داسې ثبوتونو لرلو ادعا کړې چې وايي په افغانستان کې د ملګرو ملتونو له لوري له بېوزلو خلکو سره کېدونکي بشري مرستې د اسلامي امارت لاس ته ورځي.
نوموړي دا هم ویلي چې یادې پیسې باید د اقلیمي بدلون پر وړاندې د مبارزې په برخه کې هم ونه کارول شي، ځکه چې په خبره يې دا ډول لګښتونه د امریکا له ملي ګټو سره سمون نه خوري.
د بهرنیو مرستو، بشري چارو او مذهبي ازادۍ په برخه کې د امريکا بهرنیو چارو وزارت مرستیال جیرمي لیوېن ویلي: « موږ نن په جینوا کې د ملګرو ملتونو بشري فنډونو ته د ۲ میلیارد ډالرو د ورکړې ژمنه کوو. دا تړون ۱۷ هېوادونه او همدارنګه د ملګرو ملتونو د مرکزي بېړني غبرګون فنډ پوښي، ترڅو د نړۍ په ځینو سختو بحرانونو کې خلکو ته د ژوند ژغورنې مرستې ورسوي. دا مرسته به د ملګرو ملتونو د بشري پروګرامونو لپاره وکارول شي، خو موږ داسې شواهد ترلاسه کړي چې په افغانستان کې د ملګرو ملتونو پیسې د طالبانو لاسونو ته لوېږي.»
د ملګرو ملتونو د معلوماتو له مخې، د ۲۰۲۵ کال لپاره د امریکا ټولې بشري مرستې ۳.۳۸ میلیارد ډالرو ته راکمې شوې دي، حال دا چې دا کچه تېر کال ۱۴.۱ میلیارد او په ۲۰۲۲کال کې ۱۷.۲ یېلیارد ډالر وه.
اسلامي امارت بیا د دې امریکايي چارواکي څرګندونې ردوي او وايي، اسلامي امارت په بشري مرستو کې لاس وهنه نه کوي.
اسلامي امارت له واشنګټن غوښتي چې له افغانستان سره کېدونکې بشري مرستې دې نه سیاسي کوي.
د اقتصاد وزارت مسلکي معين عبداللطیف نظري وايي: « بشري مرستې باید بشري پاتې او نه باید سیاسي شي. اسلامي امارت هېڅکله د ملګرو ملتونو په بشري مرستو کې لاسوهنه نه ده کړې بلکې یوازې یې څارنه کړې، ترڅو دا مرستې بېځایه ونه لګول شي او اړمنو کسانو ته ورسېږي.»
د اقتصادي چارو شنونکي هم په اوس وخت کې د امریکا بشري مرستې خورا مهمې ګڼي او له اسلامي امارت غواړي چې نړۍ او امریکا سره تعامل رامنځته کړي، ترڅو له افغانستان سره کېدونکې بشري مرستې کمې نه بلکې لا زیاتې شي.
د اقتصادي چارو شنونکی عبدالجبارساپی وايي: « هغه ټول سازمانونه یا هېوادونه چې له افغانستان سره مرستې کوي، باید خپلو مرستو ته ادامه ورکړي، ترڅو دلته راتلونکو څو کالو کې د بېکارۍ کچه کمه شي او خلکو ته د کار زمینه برابره شي. ترهغو دغو مرستو ته اشد ضرورت دی.»
له دې وړاندې د افغانستان پر بيا رغونې د امريکا د څار ادارې يا سيګار ويلي و چې افغانستان ته د امریکا د مرستو له بندېدو سره افغانان له ستونزو سره مخ شوي او د معلوماتو له مخې، له ۲۰۲۱کال راهیسې امریکا له افغانستان سره څه باندې۳.۸۳ میلیارد ډالرو په ارزښت بشري مرستې کړې دي.
