د ګردېز او خوست ترمنځ غځېدلې لویه لاره چې د ورځې پر مهال خورا ډېره ګڼه ګوڼه لري، موټر چلوونکو ته په کې د ټرافیکي لارښوونو اړتیا تر بلې هرې لارې ډېره لیدل کېږي. د مسوولینو په خبره، په دې وروستیو کې پر همدې لارې د ټرافیکي پېښو ګراف ډېر لوړ شوی دی.
تازه د پکتیا امنیه قومندانۍ د ټرافیک پولیسو مدیریت د ۷.۷ میلیونه افغانیو په لګښت، د ګردېزـ خوست پر لویه لاره ۱۱۰۰ ټرافیکي نښې او لارښوونې نصب کړې دي.
د پکتیا امنیه قومندانۍ ویاند منیب ځدراڼ وايي: « له تېرې کوتل څخه پیل تر وازې ځدراڼ ولسوالۍ پورې ۱۱۰۰ ټرافیکي نښې او لارښوونې په دې موخه ولګول شول چې له موټر چلوونکو سره د لارو په اوږدو کې مرسته وکړي. په دغو نښو شاوخوا ۸ میلیونه افغانۍ لګښت راغلی.»
د پکتیا د ټرافیکو د تنظیم آمر سمونمل شکورالله وايي: « په دې اړه سل په سلو کې ډاډ درکوم چې که زموږ موټر چلوونکي له دغو نښو او لارښوونو ګټه واخلي، ۹۰ سلنه ټرافیکي پېښې به کمې شي.»
په ورته مهال، د ټرافیکو مسوولین له موټر چلوونکو غواړي چې د سفر پر مهال له پوره احتیاط څخه کار واخلي.
موټر چلوونکي او عام خلک د پکتیا له مرکز څخه تر خوست پورې د نصب شویو ټرافیکي نښو لګولو اقدام ستایي؛ خو په خبره یې، اړینه ده چې موټر چلوونکي په دې برخه کې لازمې زده کړې هم ترلاسه کړي.
یو تن ټرافیک پولیس وايي: «که خلک ټرافیکي نښې رعایت کړي، ښکاره خبره ده چې د پېښو په ګراف کې به ټیټوالی راشي.»
د پکتیا اوسېدونکی دینار عادل وايي: « ټرافیکي نښې د ډرېورانو لپاره راهنما ده او که سم عمل پرې وکړي، ټکرونه او حادثې به کم شي.»
دغه نښې او ټرافیکي لارښوونې داسې مهال نصبېږي چې د خلکو په خبره، پر لویو لارو داسې موټر چلوونکي هم شته چې د موټر چلوونې جواز نه لري او تر ډېره همدغه ډول کسانو له امله ټرافیکي پېښې رامنځته کېږي.
