د کندهار کرني، اوبو لګولو او مالدارۍ ریاست مسوولین وایي، تېرو څو کالو کې د پنبې د ترویج په برخه کې هڅې بریالۍ شوې دي او هرکال یې حاصلاتو کې نږدې ۱۰ سلنه زیاتوالی راځي.
د هغوی په خبره، سږکال کندهار کې پر ۲ زره ۱۵۰ هکټاره ځمکو د پنبې کرنه ترسره شوې او تمه کېږي چې کروندګر به ترې شاوخوا ۸ زره ۶۰۰ ټنه حاصل ترلاسه کړي.
د کرنې ریاست د مسوولین په خبره، د کوکنارو بدیل او د کندهار خاورې او اقلیم ته په کتو، د پنبې کښت اوسنيو شرایطو کې کروندګرو ته تر ټولو ښه پایله ورکړې.
د کندهار کرنې، اوبو لګولو او مالدارۍ ریاست ویاند محمد حنیف حقمل وايي: « سږ کال په کندهار کې پر ۲۱۵۰ هکټاره ځمکو پنبه کرل شوې چې د تېر کال په پرتله سل هکټاره ځمکه زیاته شوې. موږ تمه لرو چې له دغو ځمکو څخه ۸۶۰۰ ټنه حاصلات ترلاسه کړو.»
کندهار کې کروندګر هم سږ کال د پنبې په حاصلاتو کې د ډېروالی پخلی کوي، خو وايي بیه یې ډېره ټیټه ده او بازار نه لري.
د دوی په خبره، حکومت دې ورته زمینه مساعده کړې؛ ترڅو د خپلو ځمکو تولید شوې وطني پنبې حاصلات نړیوالو مارکېټونو ته ورسوي.
کندهار کې د پنبې کروندګر عبدالکافي وايي: « سږ کال ډېره ښه حاصل شوی او ښه پنبه ترلاسه شوې، خو نرخونه یې ډېر ښکته دي او بزګرو ته هېڅ ګټه نه کوي.»
د پنبې یو کروندګر نادر جان وايي: « د پنبې پر کښت ډېر مصرف کېږي، خو اوس ډېر ارزانه ده. موږ له حکومت څخه هیله لرو چې د پنبې پلورلو په برخه کې مرسته وکړي.»
په ورته وخت کې د کندهار د صنعت او معدن خوني مسوولین وایي، هڅې یې پیل کړې دي چې راتلونکي کې د کندهار د پنبې حاصلات د روسیې، چین، ترکیې او یو شمېر نورو هېوادونو بازارونو ته وړاندې له نړیوالو معیارونو سره سم، صادر کړي.
دوی له کروندګرو غواړي چې راتلونکی کال د نړیوال بازار د معیارونو او غوښتنو مطابق د خپلې پنبې حاصلات راټول کړي.
د کندهار صنعت او معدن خونې اداري مدیر احمدالله عزیزي وايي: « کندهار کې د پنبې حاصلات د تېر په پرتله زیات شوي مګر بازار نه لري. له بده مرغه دلته د پنبې د پروسېس ډېرې محدودې فابریکې شته او هغه هم نسبي فعالیت لري. موږ له کروندګرو غوښتنه کوو چې حاصلات په پلاسټیکي بوجیو کې راوړي. موږ راتلونکی کال هڅه کوو چې د پنبې حاصلات په مناسبو بوجیو کې تر کارخانو پورې را ورسېږي. په لنډمهاله کې موږ د ترکیې، چین او ایران له سفارتونو سره په اړیکه کې یو، ترڅو خپلو توکو ته لاره او بازار پيدا کړو.»
د یادونې وړ ده چې د کندهار دامان، ډنډ، شاه ولیکوټ، میوند، ارغستان، معروف او ارغنداب هغه ولسوالۍ دي چې په پراخه کچه پنبه په کې کرل کېږي.
