د اسلامي امارت مشرتابه له هغوځانګړو فرمانونو وروسته چې په هېواد کې د ناوړه دودونو مخنیوي په موخه يې ورکړي، په مرکز او یو شمېر ولایتونوکې د ځايي چارواکو او ولسي خلکو له خوا پراخ هرکلي سره مخ شوي.
په همدې تړاو بلخ کې د بېلابېلو ادارو د مسوولینو له خوا ټولنه کې د ناوړه دودونو له منځه وړلو او یو بل منلو په موخه ولسي غونډه جوړه شوه.
چارواکو په دې ناسته کې د ناوړه دودونو پای ته رسول، د قاچاق مخنیوی او د خلکو تر منځ یووالی د ټولنې د ثبات لپاره مهمه بللی.
د بلخ حج او اوقافو رییس شيخ نوراغا هاشمي وايي: « موږ ته یو ښه فرصت په لاس راغلی او باید خپل کارونه په ښه توګه ترسره کړو. باید د خلکو ترمنځ اخلاص، صداقت او رفاقت پیدا شي. له دې وړاندې خلک د ژبې، قوم، سمت او مذهب له مخې وېشلي وو.»
دې ناسته کې ځايي اوسېدونکو دا ډول ناستې او یاده شوې برخه کې هڅې مهمې وبللې خو په ورته مهال يې دې سیمو کې د سړکونو، روغتیا، ښوونې او آمو سیند د تخریباتو د مخنیوي په برخو کې هم د کار غوښتنې وکړې.
د بلخ کلدار ولسوالۍ اوسېدونکی عبدالصمد حارث وايي: « د تخریب شویو ځمکو په بدل کې باید نوروې ځمکې ورکړل شي. دلته د خلکو نفوس ورځ تر بلې زیاتېږي او ورسره د امو سید تخریب هم زیات شوی.»
د بلخ کلدار ولسوالۍ اوسېدونکی عبدالرسول یلداش وايي: « د اسلامي امارت چارواکي د هغو ځمکو په اړه چې ویجاړېږي او اوسېدونکي یې بل ځای کډه کوي، غوښتنه کوو چې د دغو ځمکو په بدل کې نورې ځمکې ورکړي، ترڅو دا خلک بې کوره او بې کاره نه شي.»
په ورته مهال، د بلخ سیمه ییز چارواکي وایي د مشرتابه له خوا د سرحدي ولسوالیو لپاره د یو میلیارد افغانیو په ارزښت پروژې منظورې شوې او دا مهال يې يو شمېر ولايتونو کې چارې هم پیل شوې دي. د دوی په خبره، ژر به د بلخ سرحدي ولسوالیو کې هم يو شمېر پروژې پلې شي.
د بلخ سرحدونو، قومونو او قبايلو چارو رییس مولوي سردار محمد محمدي وايي: « د کلدار ولسوالۍ خلکو ته ډاډ ورکوم چې ستاسو وار هم رارسېږي، بودیجه تخصیص شوې، ستاسو سړکونه به جوړېږي، روغتونونه به جوړېږي او ستاسو ټولو ستونزو ته به رسېدنه کېږي.»
ټولنه کې د ناوړه دودونو مخنیوی، خپلمنځي يووالی، نشه يي توکو سره مبارزه او ښه ګاونډیتوب د اسلامي امارت د مشرتابه له هغو فرمانونو وو چې په دې غونډه کې د مسوولینو له لوري تشرېح او خلکو یې پراخ هرکلی وکړ.
