ملګرو ملتونو د یوې اعلامیې په خپرولو سره یوځل بیا افغانستان کې د حکومت له لوري د ښځو پر دندو د بندیز دوام د اندېښنې وړ بللی.
په اعلامیه کې د افغانستان لپاره د یاد سازمان د ښځو ادارې ځانګړې استازې له قوله ویل شوي، د ملګرو ملتونو په اړوند ادارو کې د ښځو پر دندو بندیز، اړمنو ته د ضروري خدمتونو پروسه له خطر سره مخ کړې ده.
د افغانستان لپاره د ملګرو ملتونو د ښځو چارو ادارې ځانګړې استازې سوزان فېرګوسن ویلي: « موږ غوښتنه کوو چې د ملګرو ملتونو په اړوند ادارو کې دې افغان ښځینه کارکوونکو ته د کار او قراردادیانو ته د ورتګ بندیز لغو شي. دفترونو او د کار په ساحه کې دې د هغوی خوندیتوب تضمین شي. هر څومره چې دا محدودیتونه اوږده شي، د ژغورنې خدمتونه به لا زیات ټکني شي.»
نوموړې همداراز ویلي، له تېرو درېیو میاشتو راهیسې د افغانستان حکومت له لوري د ملګرو ملتونو په اړوند ادارو کې د ښځو پر دندو بندیز له ګاونډیو هېوادونو د راستنېدونکو پر وضعیت او د وروستیو سختو زلزلو له امله زیانمنو ته د ملاتړ پر چمتوو کولو ناوړه اغېزې کړې.
سوزان فېرګوسن زیاته کړې: « په تېرو درېيو میاشتو کې د ملګرو ملتونو په ادارو کې د افغان ښځینه کارکوونکو نه شتون اړمنو ښځو او په ځانګړې توګه د وروستیو مرګونو زلزلو قربانیانو او هغو افغان راستنېدونکو ته چې له پاکستان او ایران څخه ایستل شوي، زموږ مرستندوی خدمتونه له ستونزو سره مخ کړي دي.»
بله خوا، د ښځو حقونو مدافعان د نجونو پر زدهکړو د بندیزونو لرې کولو ترڅنګ، اړمنو ښځو ته په ښه ډول د خدمتونو وړاندې کولو په موخه له حکومت څخه په ادارو او د ملګرو ملتونو په اړوند بنسټونو کې د ښځو پر دندو د بندیزونو لرې کولو غوښتنه کوي.
د ښځو د حقونو مدافعه صفیه وردګ وايي: « په ادارو کې ښځینه کارکوونکي د نارینه وو په پرتله ښه کولی شي د ښځو ستونزې درک کړي. له کاره د ښځو محرومول یوازې د هغوی حقونه نه بلکې د ټولنې پرمختګ او خدمات هم له خنډ سره مخامخوي. که ښځو ته د کار اجازه ورنه کړل شي، افغانستان به له نړۍ نور هم منزوي او خلک به د اړتیاوو له پوره کېدو بې برخې شي.»
حکومت د ملګرو ملتونو او د ښځو د حقونو مدافعانو دې تازه غوښتنو په اړه څه نه دي ويلي.
په ۲۰۲۳زېږدیز کال د ملګرو ملتونو په اړوند ادارو کې د ښځو پر دندو بندیز ولګول شو، خو له تېرې سپټمبر راهیسې د حکومت له لوري دغه بندیز په جدي ډول تعقیب او عملي شوی چې له امله یې د ملګرو ملتونو په ګډون، نړیوال غبرګونونه او اندېښنې هم له ځان سره لرلي.
