د افغانستان بهرنیو چارو وزارت د ستراتيژيکو مطالعاتو مرکز ریيس چې د حکومت په استازولۍ يې د دوحې په فورم کې خبرې کولې، وايي پاکستان له افغانستان سره له سوداګرۍ او ټرانزیټ څخه د سیاسي فشار په توګه کار اخلي.
د نوموړي په خبره، د پاکستان دا چلن د سیمې اقتصادي ثبات ته ګواښ دی او که خپله دا ستونزه حل نه کړي، نو د ټولې سیمې اقتصاد ننګولی شي. هغه ټینګار کوي، چې افغانستان او پاکستان باید په ګډه د دې ستونزې د هوارولو لپاره حل لارې ولټوي.
د بهرنیو چارو وزارت د ستراتيژيکو مطالعاتو د مرکز ریيس عبدالحی قانت وايي
((موږ غواړو، چې ټولې ستونزې د خبرو له لارې حل شي. موږ نه غواړو، چې بېرته شاته راوګرځو او یا د مخته تګ پر ځای شاته ګامونه واخلو. د افغانستان پرمختګ په اړه په سیمه کې هم د پام وړ څرکونه لېدل کېږي. افغانستان له پاکستان او نورو هېوادونو سره هم مثبتې اړېکې غواړي. زه فکر کوم، چې په دې وروستیو کې سوداګري د یوې سیاسي وسېلې په توګه کارول کېږي.))
نوموړي دا وضعیت لنډمهالی بحران بللی او هیله یې څرګنده کړې، چې ژر به د دواړو هېوادونو ترمنځ ستونزې حل شي. قانت وايي، د دوحې په فورم کې ویناوال او د غونډې ګډونوال د افغانستان او نړيوالې ټولني د تعامل په اړه په یوه خوله وو.
ده دا هم ویلي، چې د دې فورم په دویمه ورځ د ګډونوالو تمرکز له افغانستان سره د هېوادونو پر مثبت او اقتصاد محوره تعامل و.
ورته مهال د چارو شنونکي وايي، افغانستان په دي وروستیو کي د نړیوالو پام ځان ته را اړولی او حکومت باید هڅه وکړي، چې په نړیوالو سټیجونو له دا ډول فرصتونو څخه مثبته ګټه پورته کړي.
د سیاسي چارو شنونکی محمداسماعیل ځدراڼ وايي (( پاکستان خپلواک نه دی، د بل چا په واک کې دی او د بل چا په خوله باندې هغه کارونه کوي چې اوس یې روان کړي دي هغه که په افغانستان او یا د سیمو نورو هېوادونو کې وي پاکستان تل پروژه یي سستم لري. ))
ورته مهال د اقتصادي چارو شنونکي وايي، پاکستان له افغانستان سره د لارو تړلو له امله سخت پښیمان دی او په تېرو دوو میاشتو کې يې د مېلیاردونو ډالرو په ارزښت زيان ګاللی.
دوی غوښتنه کوي، تر هغې چې پاکستان یاده ستونزه دایمي حل نه کړي، افغانستان دې د لارو خلاصون ته له خپل اړخه اجازه نه ورکوي.
د اقتصادي چارو شنونکی محمدیونس ځدراڼ وايي (( د افغانستان او پاکستان تر منځ د سوداګرۍ موضوع کې افغانستان خپلې بدیلې لارې لري، زموږ حکومت سوداګرو ته د بدیلو لارو سوداګري فعاله ساتلې ده. ))
د دوحې فورم، چې د تېري شنبي په ورځ د ۱۵۰ هېوادونو او سازمانونو څخه د ۵زره کسانو په ګډون په قطر کې پيل شوی و، د دوشنبې په ورځ پای ته ورسېده.
پاکستان ډېر کله له افغانستان سره سوداګریزې لارې په بېلابېلو پلمو تړلې، چې افغان سوداګرو ته به یې د میلیونونو ډالرو زیان اړولو.
دا ځلې د کابل او اسلام اباد ترمنځ د اړیکو د ترینګلتیا راهیسې د افغانستان او پاکستان ترمنځ ټولې لارې له تېرو دوو میاشتو راهیسې د اسلام اباد له لوري تړل شوې، چې په غبرګون کې یې افغانستان هم له پاکستان سره خپلې ټولې سوداګریزې اړیکې پرې کړې.
