د پاکستان پوځي رژيم یو ځل بیا اوربند مات کړ او د شنبې شپه یې په سپين بولدک کې پر ډيورنډ فرضي کرښه مېشتو افغان ځواکونو بريد وکړ چې د افغان ځواکونو له سخت او چټک غبرګون سره مخ شو.
د پاکستاني پوځیانو په برید کې لسو ملکي افغانانو ته مرګ ژوبله اوښتې چې له ډلې یې پنځه تنه شهیدان او پنځه نور ژوبل دي.
د اسلامي امارت مرستیال ویاند حمد الله فطرت وايي: « متأسفانه پاکستاني لوري یوځل بیا د کندهار پر سپین بولدک ولسوالۍ بریدونه ترسره کړل او وروسته د اسلامي امارت ځواکونه هم غبرګون ته اړ شول او د شپې تر ۱۱ نیمو بجو یې دوام وکړ. په دې برید کې د یوه مجاهد په ګډون زموږ پنځه تنه هېوادوال په شهادت رسېدلي او پنځه نور ژوبل شوي دي.»
د پاکستان پوځي رژيم ټول بریدونه د عامو افغانانو له سخت حساسيت سره مخ شوي او شنبې شپې بريد يې هم خلک غوسه کړي دي. دوی وايي، چمتو دي چې د پاکستان پوځي رژيم هر ډول تېري پر وړاندې په متحدانه توګه د يو بل ترڅنګ له درېدو سره د هېواد ساتنه وکړي.
د بلخ اوسېدونکی غلام علي ملکزی وايي: « دا لومړی ځل نه دی چې پاکستان پر افغانستان تېری کوي بلکې دا څووم ځل دی چې د نړیوالو قوانینو او اصولو پر خلاف زموږ پر خاوره برید کوي. موږ د خپلو امنیتي ځواکونو تر شا ولاړ یو او له خپل هېواد به د سر په بیه دفاع کوو.»
د کندهار اوسېدونکی نوید احمد وايي: « موږ د خپل سر، مال او هرڅه به بدل کې دېته چمتو یو چې د پاکستان خلاف د خپلې خاورې دفاع وکړو.»
د چارو څارونکي پر افغان ځواکونو د پاکستان پوځي رژيم دې بريدونو ته د شک په نظر ګوري او زياتوي چې پاکستان په دې توګه په افغانستان کې وسله والو ډلو ته د فعاليت زمينه سازي کوي او خپل دې هدف ته د رسېدو لپاره هېڅ نړيوال اصول په پام کې نه نيسي.
د سیاسي چارو شنونکی کمال ناصراصولي وايي: « پاکستان نه یوازې ښه ګاونډی نه دی بلکې تل یې په افغانستان کې داسې نظامونه غوښتي چې افغانستان کنټرول نه کړای شي او کمزوری وي. دوی اوس دېته اندېښنه نه لري چې د سولې او امنیت ټینګښت په راتلونکي کې د یوه قوي مرکزي دولت جوړېدو ته لاره هواره نه کړي. دوی هڅه کوي چې دا ساحه نا امنه کړي او مختلفې ترهګرې ډلې په افغانستان کې مېشت کړي او هرې خواته د دوی په کارولو سره سوداګري وکړي. افغانان باید په داسې یوه حساس وخت کې متحد و اوسي، ترڅو د پاکستان هر ډول دسیسه شنډه کړای شي.»
د چارو شنونکی توریالی ځاځی وايي: « پاکستان د افغانستان په اړه ډېر جنایتکارانه او ظالمانه سیاست لري. پاکستان او اسراییل دواړه یو ډول پالیسي لري، دواړه د نړۍ کنوانسیونونو او اصولو ته غاړه نه ږدي. بدبختي دا ده چې په افغانستان کې د دوی پر جنایتونو نړیوال چوپه خوله دي.»
ځينې نور بيا تجويز کوي چې د پاکستان پوځي رژيم پروړاندې د واحدې پرېکړې کولو په موخه باید ملي اجماع رامنځته شي.
دوی وايي، د دې ترڅنګ باید هڅه وشي چې د ځواکمنې ډېپلوماسۍ پرمټ د سیمې هېوادونو له لارې پر پاکستان فشار راوړل شي، ترڅو د افغانستان پر وړاندې خپله دا پروژه یې تګلاره بدله کړي.
د پوهنتون استاد فیض محمد ځلاند وايي: « موږ ته اړتیا ده چې د اقتصادي بدیلو لارو لټولو په څېر بدیلي سیاسي لارې هم ولټوو. باید په کوردننه ملي اجماع او جرګه وشي او د پاکستان په ضد یو ولسي او د ټولو قومونو، پرګنو او جهتونو په مشوره یوه پرېکړه وشي. همدارنګه له نړۍ وغوښتل شي چې پاکستان له خپلو شومو پالیسیو را وګرځوي؛ د سیمې له هېوادونو سره ژوره ډېپلوماسي وکارول شي، ګڼ سفرونه وشي، ترڅو سیمه هم پر پاکستان فشار وارد کړي.»
په تېره شاوخوا یوه نیمه میاشت کې دا څووم ځل دی چې پاکستانی پوځي رژیم د افغانستان حریم نقضوي او د ټولو نړیوالو قوانینو او اصولو خلاف پر افغان خاوره بریدنه کوي. په دغو بریدونو کې تر ډېره عامو خلکو ته مرګ ژوبله اوړي، هغه څه چې جنګي جنایت بلل کېږي؛ خو د بشري حقونو مدافع نړيوالو بنسټونو یې پر وړاندې خاموشي اختيار کړې ده.
