د کور او ښار جوړولو وزارت مسوولینو لغمان پادپښ ولسوالۍ اړوند کافر ګلۍ د کډوالو ښارګوټي کې له کډوالۍ راستنو شویو هېوادوالو ته د ځمکو وېش لړۍ پیل کړه.
د لغمان ولایتي ادارې چارواکي وايي، دا ښارګوټی د ۱ زر ۵۰۰ جریبه ځمکې په لرلو سره نږدې ۱۲ سوه کورونو د جوړېدو ظرفیت لري.
د لغمان والي بختیار معاذ وايي: « د دې لپاره چې د مهاجرینو د استوګنیزو نمرو مشکل حل شي، دا ځمکه چې تقریبا ً یونیم زر جریبه ځمکه ده، د شاوخوا ۱۲ کورونو لپاره بسنه کوي، مهاجرینو ته یې وېش پيل او سم لاسي یې د سړکونو، مکاتبو، مدارسو، مساجدو، کلینیکونو او نورو اړینو تأسیساتو جوړولو کار هم پيل شول.»
د کور او ښار جوړولو وزارت چارواکي بیا ډاډ ورکوي چې د راستنو شویو لپاره د هر ډول اسانتیاوو برابرولو ته ژمن دي او په خبره يې، د دې ښارګوټي پرانیسته هم د همدې ژمنو یوه برخه ده.
د کور او ښار جوړولو وزیر مولوی نجیب الله حیات حقاني وايي: « دا د قرآن، حدیث او دین مهاجر دي او د خپل ایمان د تحفظ لپاره یې هجرت کړی و. که څه هم د مهاجرو راستنېدل ډېر دي، خو تر اوسه پورې کومه ستونزه او ناورین نه دي پېښ شوي.»
له کډوالۍ راستانه شوي بیا خوښ دي چې په خپل ولایت کې ورته د سرپناه لپاره ځمکه ورکول کېږي.
دوی په بهرنیو هېوادونو کې له مېشت افغان کډوالو هم غوښتنه کوي چې په عزت سره دې خپل هېواد ته راستانه شي او د هېواد ابادۍ کې د برخه واخلي.
له کډوالۍ راستون شوی سید هاشم وايي: « موږ ته یې زنګ وهلی و چې راشی موږ تاسو ته ځمکې درکوو. زه له اسلامي امارت ډېر خوشاله یم چې په دې شهرک کې موږ ته ځمکې راکوي.»
تازه راستون شوی زړګی وايي: « زه له اسلامي امارت ډېر خوښ یم چې دلته موږ ته ځمکې راکوي. زه په نورو هېوادونو کې له مهاجرو افغانانو غوښتنه کوم چې وطن ته راشي، ځکه دلته امن دی او هرڅه برابر دي.»
لغمان کې کډوالو ته د ځمکو وېش بهیر داسې مهال پیلېږي چې له پاکستان څخه ورځ تربلې د افغان کډوالو د جبري ایستلو لړۍ چټکېږي او هره ورځ لسګونه کورنۍ هېواد ته په جبر او خپله خوښه راستنول کېږي.
