له څه ځنډ وروسته د افغانستان بشري حقونو په برخه کې د ملګرو ملتونو ځانګړی راپور ورکوونکی دوحې ته په سفر ځي. د ملګرو ملتونو بشري حقونو عالي شورا په يوه اعلاميه کې ويلي، نوموړی به په دې څلور ورځني سفر کې له قطري چارواکو، افغانانو، سيمهييزو او نړيوالو سره د افغانستان د بشري حقونو پر وضعيت وغږېږي.
په اعلاميه کې ويل شوي، له يادو لوریو سره د نوموړي د ناستو موخه پرهغو لارو چارو خبرې اترې دي چې پر بنسټ به يې د افغانانو د حقونو د خوندیتابه په اړه يو ګډ دريځ رامنځته شي.
د ملګرو ملتونو د بشري حقونو عالي شورا ویلي: « هغه به د قطر له حکومتي چارواکو، افغانانو او په قطر کې د مېشتو نړيوالو ټولنو له غړيو سره پر داسې لارو چارو خبرې وکړي، ترڅو وکولی شي د سيمې او نړۍ هېوادونه د افغانانو د حقونو تامين په اړه يو موټی شي.»
د افغانستان حکومت د نوموړي د دې سفر په اړه څه نه وايي، خو شنونکي يې له دې امله مخالفت کوي چې په خبره يې ښايي د حکومتي پلاوي د نه موجوديت په صورت کې د افغانستان بشري حقونو د موجوده حالت سم انځور وانه خیستلې شي.
د سیاسي چارو شنونکی اختر محمد راسخ وایي: « د ریچارډ بېنېټ د سفر اصلي هدف دا دی چې دوی وکولی شي د نړیوالې ادارې تر چتر لاندې یوځل بیا د خپلو پلانونو د پلي کولو او لاسونو لپاره لاره هواره کړي. زه فکر کوم، تر هغو چې په دې اړه د غربي هېوادونو له خوا پرېکړه نه وي شوې، دوی هم نه شي کولی خپلو موخو ته ورسېږي او نه شي کولی د نړیوالې ټولنې په توګه ښه منځګړیتوب وکړي.»
ځينې نورشنونکي د دې په خلاف تمه لري چې قطر ته د ريچارډ بېنېټ سفر به ګټور وي او زياتوي چې په دې سفر کې بايد داسې هڅه وشي، ترڅو نوموړی په راتلونکي کې د افغانستان بشري حقونو وضعيت څخه پر واقعیتونو ولاړ راپور وړاندې کړي.
د سیاسي چارو شنونکی عزیز معارج وايي: « که د بشري حقونو استازي د افغانستان لپاره هلته ځي، خامخا به ښې لاسته راوړنې ولري. ځکه له مطرح هېوادونو او افغانانو سره به لیدنې وکړي، خو دا هغه وخت کېدای شي چې دی د بشري حقونو په اړه واقعي راپور یوسي او د افغانانو واقعي ستونزې مطرح کړي.»
ملګرو ملتونو تل د افغانستان بشري حقونو موضوع مهمه ګڼلې او له همدې امله یې د بشري حقونو عالي شورا د ۲۰۲۵ کال په اکټوبر کې د ځانګړي راپور ورکوونکي په توګه د رېچارډ بېنېټ ماموریت د يو بل کال لپاره تمديد کړ.
د افغانستان حکومت مدعي دی چې نوموړی په خپلو راپورونو کې د بشري حقونو وضعيت په اړه واقعيتونه نه منعکسوي او له همدې امله يې ورسره همکاري پرې او افغانستان ته يې ممنوع الدخول اعلان کړی.
