د کابل او اسلام اباد ترمنځ د جنجال له زیاتېدو او سوداګرۍ بندېدو وروسته، د سیمې او ګاونډ هېوادونو ته د اسلامي امارت چارواکو سفرونه د دې ښکارندويي کوي چې دا هڅې د پاکستان پرځای د بدیلو لارو موندلو لپاره دي.
نوي ډیلي ته د صنعت او سوداګرۍ وزیر له سفر وروسته، نور الدین عزیزي تازه د ترکیې هېواد په بلنه د استانبول په حلال نړیوال نندارتونو او کنفرانس کې هم ګډون کړی.
د ياد وزارت مسوولان په دې کنفرانس کې د حکومتي پلاوي ګډون د نورو ګډونوالو هېوادونو له استازو سره د سوداګریزو او اقتصادي اړیکو زیاتوالي، د افغانستان غوره اقتصادي فرصتونو او د بهرنۍ پانګې جذب په برخو کې مهم بولي.
د صنعت او سوداګرۍ وزارت ویاند اخندزاده عبدالسلام جواد وايي: « دا ستر نندارتون چې د سوداګرۍ، حلال تولید او خدماتو په برخه کې تر ټولو معتبر نړیوال محفل ګڼل کېږي. د صنعت او تجارت وزیر د دې نندارتون په پرانستغونډه کې د وینا پرمهال د حلالې سوداګرۍ د پراختیا، اقتصادي همکاریو، د نړۍ او سیمې په بازارونو کې د افغانستان د رول پر اهمیت ټینګار وکړ. حلال نندارتون د هېوادونو تولیدي، صادراتي او د پانګونې ظرفیتونو د معرفي کولو لپاره مهم فرصت برابروي. افغان سوداګرو او شرکتونو هم په دې نندارتون کې د غرفه لرونکو او لیدونکو په توګه فعال حضور درلود او د افغانستان محصولات او صنعتي وړتیاوې یې معرفي کړې.»
له دې سره، د صنعت او سوداګرۍ وزیر به د اقتصادي همکاریو سازمان غړیو هېوادونو له وزیرانو سره ناسته کې چې ټاکل شوې په ترکیه کې جوړه شي، له يادو هېوادونو سره د افغانستان د سوداګرۍ حجم زیاتوالي په اړه بحث او خبرې وکړي.
شنونکي د افغانستان او پاکستان ټرانزیټي او سوداګریزو اړیکو پیکه کېدو ته په اشارې په دې کنفرانس کې د حکومتي پلاوي ګډون مهم بولي.
د اقتصادي چارو شنونکی عبدالنصیر رښتیا وايي: « پرته له شکه چې د دې ډول نندارتونو یوه موخه د اقتصادي او تجارتي همکاریو پراختیا ده او د افغانستان ګډون کولی شي ډېر ګټور تمام شي؛ ځکه چې افغانستان په وچه پورې تړلی هېوا دی او هرڅومره چې ډېرې بدیلي لارې ولري، د افغاستان په ګټه دي.»
له دې سره همهاله، د اقتصادي چارو یوشمېر نور شنونکي په دې باور دي چې له ګاونډویو هېوادونو سره د افغانستان سټراټیژیکو اقتصادي اړیکو ډېرښت کولی شي کابل اقتصادي ځان بسیاینې ته ورسوي او نړیوالو بازارونو ته د افغاني محصولاتو د لا ورپېژندنې په موخه نوې لارې پرانیزي.
د اقتصادي چارو شنونکی سید مسعود وايي: « کومې ناستې چې په ترکیه کې له سي پنځه یا د منځنۍ اسیا له هېوادونو سره کېږي، په دې کې باید داسې زمینه برابره شي او خبرې وشي چې پاکستان د تجارت پر وړاندې هېڅ ډول ممانعت ونه شي کولی او زموږ پر وړاندې لارې وتړي.»
استانبول حلال نړیوال نندارتون او کنفرانس به د ۱۱۰ هېوادونو دولتي مقاماتو او خصوصي سکټور استازو په حضور کې د روان کال نومبر میاشتې له ۲۶ تر ۲۹ مې نیټې پورې د ترکیې په استانبول کې جوړ او ترسره شي.
