د افغانستان او ترکمنستان ترمنځ پر ټرانزیټ بدلېدونکې لارې د ۲۵ کیلومټرو په اوږدوالي د لومړي فاز سړک جوړولو چارې پيل شوې.
د کلفت بندر سړک وروسته له۹۰ کالونو په دې ډول جوړېږي. مسوولین وايې، د لومړي فاز چارو ته یې۴۵۰ میلیونه افغانۍ ځانګړې کړې دي.
په ورته مهال، د پروژې قراردادي شرکت مسوولین بیا د کار له کیفیت ډاډ ورکوي او زیاتوي چې په ورکړل شوې دوه کلنه موده کې به يې پای ته ورسوي.
د بلخ ولایت د ټولګټو رییس عبدالصبور صابر وايي: « دا پروژه چې نن یې پرانستنه کېږي، له بلخ ولسوالۍ څخه پيل تر قرقین او خماب ولسوالیو پورې ادامه لري او بیا له ترکمنستان هېواد سره وصل کېږی. دا یو ټرانزیټي سړک دی او نږدې ۹۱ کیلومټره اوږدوالی لري او رغول یې په ۳ فازونو کې د ټولګټو وزارت له خوا منظور شوي دي. د دې سړک لومړی فاز له بلخ ولسوالۍ څخه پیل تر چاهي ولسوالۍ پورې دی او راتلونکو دوو کالو کې به بشپړ شي.»
د قراردادي شرکت مسوول امان الله زهیر وايي: « حکومت او ولس ته ژمنه ورکوو چې پروژه به په ښه کیفیت له ټاکلي وخت څخه وړاندې تطبیق کړو. موږ به د چمتو کړي پلان له مخې په یوه وخت کې په څو سېکشنونو کې کار کوو.»
دا سړک چې له بلخ ولسوالۍ څخه پیل او له چاهي او دولت اباد ولسوالیو په تېرېدو د جوزجان قرقین او خماب ولسوالیو کې د ۹۱ کلیومټرو په اوږد والي له ترکمنستان هېواد سره نښلېږي.
همدارنګه، چارواکي په دې ډول عام المنفعه او ملي پروژو کې د خلکو همکاري مهمه بولي او ټینګار کوي چې ځايي خلک دې د دې سړک په ساتنه کې خپل مسوولیت اداء کړي.
د ټولګټو وزارت تخنیکي مرستیال عبدالکریم فاتح وايي: « د پروژې له پلي کېدو څخه وروسته مو غوښتنه دا ده چې د سیمې خلک د دې پروژې په ساتلو کې همکاري وکړي. باید د داسې کارونو له ترسره کولو ډډه وشي چې د سړک د تخریب سبب کېږي.»
د بلخ والي مرستیال نورالهادي ابو ادریس وايي: « خلک دې ډاډه اوسي چې راتلونکو څو کالو کې به ګام په ګام د دوی ټولو ستونزو ته رسېدنه کېږي. موږ به که خدای کول ځان بسیا کېږو او د نورو هېوادونو له احتیاج به خلاصېږو.»
ځايي اوسېدونکي د دې سړک له جوړېدو هرکلی کوي او زیاتوي چې په دې سره به یې ګڼې ستونزې حل او د کلفت بندر په بیا ځل فعالیت سره به يې سیمه کې اقتصادي پرمختګ ته لاره هواره شي.
د سیمې اوسېدونکی عبدالجبار وايي: « د دې سړک اساسي جوړېدل به خلکو ته ډېرې اسانتیاوې برابرې او ګټې ورسوي.»
د سیمې اوسېدونکی عطا محمد وايي: «موږ له دې سړک سره ډېرې ستونزې لرلې، اصلا ً د تګ راتګ نه و. اوس چې جوړېږي، د خلکو ستونزې به هم ورسره رفع شي. له حکومت مننه کوو چې دا سړک جوړوي.»
شېرخان، حیرتان او آقینه د هېواد په شمال کې هغه سوداګریز بندرونه دي چې دا مهال له منځنۍ اسیا سربېره، اروپايي هېوادونو سره هم د افغانستان راکړه ورکړه ترې ترسره کېږي.
د دې سړک له جوړېدو سره به د افغانستان یو بل بندر(کلفت) هم له ترکمنستان سره وصل او فعال شي.
