پاکستان چې تل یې په دې هېواد کې له مېشتو افغان کډوالو څخه پر افغانستان د فشار د یوې وسیلې په توګه کار اخیستې، د اسلامی امارت له بیا واکمنېدو راهیسې یې دا بهیر لا ګړندی کړی.
اسلام اباد وروسته له هغې چې له کابل سره یې د پاکستاني طالبانو تحریک پر سر اړیکې ترینګلې شوې او د دواړو هېوادونو د ځواکونو ترمنځ د ډیورنډ فرضي کرښې په اوږدو کې وسله والې نښتې وشوی، د افغان کډوالو پر وړاندې د ظلم او زور زیاتي له ټولو حدودو تېر شو.
د بشر او کډوالو د حقوقو یو شمیر فعالانو، د افغان کډوالو په وړاندې د اسلام اباد ظلم او زور زیاتي ته په غبرګون کې د ډیورنډ د پولې بلې غاړې ته د اعتراض خیمې درولې دي.
په پاکستان کې د افغان کډوالو استازی اکرم خان وايي:« کوم افغانان چې له پاکستان څخه افغانستان ته ځي یا ډیپورټ کېږي، نه باید د هغوی کور، ځمکې یا نورو شتمنیو ته نقصان ورسېږي. همدارنګه نه باید د هغوی بې عزتي وشي.»
یو پاکستان مېشت افغان کډوال وايي: « موږ له سفر نیولې تر وزیره، ټولو څخه هیله لرو چې زموږ د ستونزو غم وخوري.»
اعتراض کوونکي وايي، پاکستاني چارواکو د افغان هلکانو او نجونو پر وړاندې د ښوونځي دروازې هم تړلې دي او دغه بهیر لا روان دی.
اعتراض کوونکي د پاکستاني چارواکو د دې چلن پر وړاندې بیا د ملګرو ملتونو د ادارو او په تېره بیا د کډوالوعالي کمېشنرۍ پر چوپتیا انتقاد کوي او په افغانستان کې دننه د زده کړو د زمینې د برابرولو غوښتنه کوي.
د بشري حقونو فعال عبدالکریم مبارز وايي: « له دواړو هېوادونو هیله لرو چې یوڅه نرمښت وښيي، ترڅو هلته د تعلیم دروازې خلاصې شي. له بلې خوا ژمی هم را روان دی او خلک له ډېرو ستونزو سره مخ دي.»
یوه پاکستان مېشته افغان کډواله وايي: « د پاکستان دولت له افغان مهاجرو سره بې رحمانه چلن کوي. دلته په کمپونو کې راټول کړي کډوال هم له سخت وضعیت سره مخ دي، مناسب ځای نه لري او روغتیايي وضعیت یې ښه نه دی. د پاکستان له دولت غوښتنه کوم سهولتونه رامنځته کړي.»
د چارو یو شمیر کتونکي بیا په دې باور دي چې پاکستان تل له کډوالو څخه پر افغان حکومت د فشار د یوې وسیلې په توګه کار اخلي، ترڅو خپل اهداف پلي کړای شي.
د افغانستان د کډوالو او راستانېدونکو چارو وزارت له خوا د خپرو شویو معلوماتو له مخې، په تېره لړم میاشت کې ترکیې، ایران او پاکستان شاوخوا ۲۵۰ زره افغانان هېواد ته راستانه کړي چې ډېره برخه یې له پاکستان څخه په اجباري ډول ایستل شوي دي.
