له شاوخوا یوې اوونۍ راهیسې د تورخم لارې تړل کېدو له امله د فرضي کرښې دواړو غاړو ته له ۵ زرو ډېر بار وړونکي موټر ایسار پاتې دي.
د سوداګرۍ خونه وايي، سوداګرو ته له دې درکه د اوښتی زیان کچه ۱۰میلیونو ډالرو ته رسېږي.
تازه د کورنيو چارو وزارت وايي، د يادې لارې د خلاصون په اړه له پاکستاني چارواکو سره څو ځله خبرې شوې خو څه پرمختګ نه دی شوی.
د ياد وزارت د چارواکو په خبره، د تورخم لار د پاکستان له لوري تړل شوې او بېرته خلاصول يې هم په دوی پورې اړه لري.
د کورنیو چارو وزارت عبدالمتین قانع ویاند غوښتنه کوي چې ستونزو ته په کتو باید لاره ژر ترژه خلاصه شي.
قانع زیاتوي:« د تورخم په اړه باید دومره ووایم چې موږ هڅه کوو ډیپلوماسي له یوبل سره وپالو، خو دا ځل دروازه د مقابل طرف یانې پاکستان له خوا تړل شوې ده. موږ تېره ورځ هم ناسته درلوده او نن هم. هڅه مو دا ده چې ستونزه ژر ترژره حل شي، خو ستونزه له هغې خوا جوړه شې، نه زموږ له خوا. موږ به بیا هم مجسلونه ولرو؛ ترڅو ستونزه حل شي.»
د اقتصادي چارو یو شمېر شنونکي وایي، پاکستان د خپلو پالیسيو په دوام هڅه کوي چې افغان سوداګر زیانمن او له افغانستانه نورو هېوادونو ته د صادراتو لړۍ ټکنۍ کړي.
د اقتصادي چارو شنونکی نورالله عزیز وايي: « دا د پاکستان همېشنۍ پالیسي ده چې د افغانستان سوداګر، خلک او تجارت متأثره کړي. تل یې هڅه کړې چې د افغانستان د صادراتو کچه کمه کړي او تدریج سره د افغانستان پانګوالو ته زیان ورسوي. د حکومت مسوولین باید په دې برخه کې له پاکستان سره بالمثل عمل وکړي او یا هم له تعرفو ګټه واخلي.»
د اقتصادي چارو شنونکی محمد یونس ځدراڼ وايي: « مخکې هم دا کار شوی او څو څو ځله تکرار شوی. که موږ په دې اړه هرڅومره ډېپلوماټیک مذاکرات وکړو، قراردادونه لاسلیک کړو یا هم تعهدات ترې واخلو، دا یو کار هم مثبته نتیجه نه لري.»
که څه هم پاکستان له دې وړاندې ډېر ځله د افغانستان د سبو ( سبزیو) او مېوو د رسېدو په موسم کې په بېلابېلو پلمو د تورخم لار تړلې، خو د سیاسي چارو یو شمېر شنونکي وایي، پاکستان له هرې ممکنې لارې هڅه کوي چې افغانستان په سیاسي او اقتصادي انزوا کې وساتي.
د دوی په خبره، سرپرست حکومت باید دا ډول مسایل نړیوالو ته وړاندې کړي، ترڅو د دایمي حل لپاره یې په لارو چارو غور وشي.
د سیاسي چارو شنونکی اختر محمد راسخ وايي: « دوی د ډېورېنډ د کرښې او همدغو دروازو له لارې، افغانستان نیمه پېړۍ په جګړو کې ښکېل کړ او موږ ته یې میلیاردونه ډالر زیانونه ورسول. د دې ستونزې د حل کولو لپاره باید د بهرنیو وزارت له آدرسه د نړیوالو په شتون کې په کابل کې د پښتنو یوه لویه جرګه جوړه شي او د کرښې ستونزه حل کړي. ترهغو چې د ډیورېنډ کرښې معضله حل نه شي، په افغانستان کې د امنیت راتګ او د اقتصادي زیانونو مخنیوی نا ممکنه دی.»
د کب میاشتې له درېیمې نېټې راهیسې پاکستان د تورخم لار د هر ډول تګ راتګ پر مخ وتړله. له دې وړاندې د صنعت او سوداګرۍ وزارت سرپرست په یوه خبري کنفرانس کې د سوداګرو پوښتنو ته په ځواب کې وویل، راتلونکی کال تصور نه شي کېدای چې له پاکستان سره به اړیکې څه ډول وي؛ خو له سوداګرو يې غوښتي وو چې د سوداګرۍ لپاره دې د بدیلو لارو لټه وکړي.
