د ملګرو ملتونو بشري حقونو سازمان په ۵۸ ناسته کې چې د فبرورۍ له ۲۴ مې د اپرېل تر ۴ مې پورې دوام کوي، د افغانستان ، ایران ، فلسطین ، اوکراین ، سوډان او یو شمېر نورو هېوادونو پر وضعیت خبرې کوي.
د دې سازمان راپور له مخې، په دې ۱۰ ورځنۍ ناسته کې به راتلونکې جمعه د افغانستان لپاره د ملګرو ملتونو ځانګړی راپور ورکوونکی ریچارې بېنېټ راپور وړاندې کړي.
راپور کې ویل شوې، په یو شمېر هېوادونو کې د بشري حقونونقض په اړه به د ملګرو ملتونو لسګونو غړي هېوادونو استازي خپل نظرونه او وړاندیزونه شریک کړي.
د سیاسي چارو کارپوهان وايي، ملګري ملتونه له نږدې څلورو کلونو راهیسې د افغانستان بشري وضعیت سره د همکارۍ لپاره یو منظم مکانېزم نه لري.
د دوی په خبره، یاد سازمان د خپلو موخو لپاره دا ډول ناستې جوړوي.
د سیاسي چارو کارپوه عزیز معارج وايي:« متاسفانه د ملګرو ملتونو سازمان خپلې موخې مخې ته وړي او د افغانستان له ملت سره ډېر چل کوي. له څلور کلونو راهېسې بېلابېلې ناستې یې جوړې کړي دي، خو په دې کې یې همجانبه توافق یې هم نه دی کړی او داسې یو عملي میکانېزم یا یو سیسټم یې هم نه دی جوړ کړی چې دوی د افغانستان ستونزو حل، مرستو، اصلاحاتو یا اوسني حالت کې د ناخوالو له منځه وړلو لپاهرو یا واقعا د بشر حقونو لپاره کوم تدابیر ونیسي.»
په ورته وخت کې ځینې نور بیا له سرپرست حکومته غواړي چې له نړیوالو سره د تعامل او د افغانانو غوښتنو له مخې دې پر ښځو او نجونو د تعلیم او کار محدودیتونه لرې کړي.
د سیاسي چارو کارپوه محمد زلمی افغانیار وايي:« د حکومت دارۍ او حکومت جوړونې او د ننګونو د حل بحث د افغانستان ملت پورې اړه لري. اوسنی حکومت مکلف دی چې د خپلو خلکو غږ واوري او د خلکو پرغوښتنو عمل وکړي.»
د ملګرو ملتونو بشري حقونو سازمان داسې مهال د افغانستان په اړه ناسته کوي چې تېره سه شنبه د افغانستان لپاره د دې سازمان سیاسي استازولۍ (یوناما) مشرې روزا اتونبایوا هم له سرپرست حکومت غوښتي وو چې د ښځو او نجونو پر وړاندې وضع شوې محدودیتونه لرې کړي.
خو په ورته مهال سرپرست حکومت بیا تل ټینګار کړی چې د اسلامي اصولو او افغاني کلتور سره سم یې ټولو افغانانو ته حقونه خوندي کړي او هم د بشري حقونو نقض په اړه د ملګرو ملتونو راپورونه یې یو اړخیز او له واقیعتونو لرې بللي دي.
