د افغانستان بانک سرپرست نور احمد آغا د یوه پلاوي پر مشرۍ په مالي چارو کې د سایبري امنیت نړیوال کنفرانس کې د ګډون په موخه، د روسیې یکاترینبورګ ښار ته رسېدلی.
ټاکل شوې په دې کنفرانس کې چې د روانې فبرورۍ میاشتې تر ۲۰ نیټې پورې به دوام کوي، د بېلابېلو هېوادونو د مالي سکټور متخصصين او څېړونکي د بانکوالۍ پر لا عصري کولو، مالي امنيت او د سايبري ګواښونو د مخنيوي پر اغېزناکو لارو چارو خبرې وکړي.
د افغانستان بانک مسوولین وایي، پر يادو مسايلو سربېره به د کنفرانس ګډونوال د سایبري بریدونو پر وړاندې د مقاومت لوړولو، ډیجیټلي بانکوالۍ او د نويو ټکنالوژیو د امنیتي چوکاټونو پر پراختیا هم خبرې وکړي.
د افغانستان بانک ویاند حسیب الله نوري وايي: « د افغانستان بانک د ټولو رییس ښاغلي نور احمد آغا پر مشرۍ یو پلاوی د روسیې هېواد ته ولاړ، ترڅو په مالي چارو کې د سایبري امنیت نړیوال کنفرانس کې ګډون وکړي. په دې کنفرانس کې د نړۍ د اکثریت هېوادونو د مالي او بانکي بنسټونو مشران، متخصصان، څېړونکي او نور غړي ګډون لري. په دې کنفرانس کې به د سایبري امنیت، د عصري بانکوالۍ سیسټمونو رامنځته کولو او همدارنګه د سایبر ننګونو پر وړاندې د معاصرو تدابیرو رامنځته کولو په اړه بحثونه ترسره شي.»
د اقتصادي چارو کارپوهان دغه کنفرانس د سايبري امنيت په برخه کې د نويو تجربو ترلاسه کولو او د بانکي سکټور د سايبري امنيت خونديتوب په موخه د تدابیرو پياوړتيا لپاره مهم بولي.
د اقتصادي چارو شنونکی عبدالجبار ساپی وايي: « دا کنفرانس په څو برخو کې د افغانستان لپاره مهم دی، یو دا چې موږ باید له هغو تجربو او کنفرانسونو خبر شو چې څنګه د افغانستان د بانکونو او پیسو امنیت ساتلی شو، یا دا چې افغانستان څنګه کولی شي بانکي اړیکې ټینګې کړي. همدارنګه په دغو کنفرانسونو کې له نورو بانکونو سره په مالي او نورو برخو کې اړیکې ټینګېږي.»
ځينې نور بیا وايي، د اقتصادي ودې لپاره اړتیا ده چې پر بانکونو لګېدلي بندیزونه لرې شي او د روسيې په کوربه توب د اوسني کنفرانس د ورته ناستو له لارې، سرپرست حکومت په دې اړه نړيوالو ته ډاډ ورکولی شي.
د اقتصادي چارو شنونکی استاد مسعود وايي: «دوی باید هلته زده کړه وکړي او دلته یې را انتقال کړي. زه فکر کوم یوه لویه لاسته راوړنه به منځته راشي او ترڅنګ به یې هغه حرکتونه چې د افغانستان مرکزي بانک ترسره کړي او هلته راپور لري، زه فکر کوم چې حتا کولی شي د نورو مرکزي بانکونو اعتبارونه د افغانستان له مرکزي بانک سره ایجاد کړي.»
د اقتصادي چارو شنونکی عبدالنصیر رشتیا وايي: « دا ډول مجسلونه ډېر ګټور دي، ترڅو موږ وکولی شو له ورځنیو شرایطو سره ځان عیار کړو. دا ډول ورکشاپونه او کنفرانسونه ګواښونو ته د چمتو کېدو او له دې ګواښونو د مخنیوي لپاره اړین دي او کولی شي زموږ د بانکي سیسټمونو اعتبار لوړ کړي.»
په دې کنفرانس کې د افغانستان بانک پلاوی داسې مهال ګډون کوي چې پر بانکي سکټور لګېدلو بندیزونو د افغانستان پر اقتصاد منفي اغېز کړی او دغو محدودیتونو نړیوالو بانکونو ته د افغانستان د بانکونو لاسرسی له ستونزو سره مخ کړی دی.
