کارپوهان: بهرنیان د ټولګډونه حکومت په نوم اوسني نظام کې خپلو ګټو ته ژمنې څېرې ځای پرځای کول غواړي

د سیاسي چارو یو شمېر کارپوهان وايي، افغانان د داسې حکومت د جوړښت هېله لري،چې ټول افغانان په کې ځان وګوري ، نه دا چې د ټولګډونه په نوم تکراري څېرې په نظام کې بیا ځلې ونډه ولري.

دوی وايي، هغه هېوادونه،چې په افغانستان کې پرټولګډونه حکومت ټینګار کوي،موخه یې د افغانستان په حکومت کې خپلو ملګرو او ګټو خوندي کوونکي اشخاصو د خیلولول دي،هغه څه چې د ګتې پرځای به تاوان ولري.

دوی زیاتوي، که په افغانستان کې هر ډول حکومت رامنځ ته کیږي،نو جوړښت یې د بهرنیانو نه بلکې د افغانانو کار دی.

د سیاسي چارو کارپوه سرور نیازی وايي:« د ټولګډونه حکومت په نوم بهرنیان غواړي،چې خپل اجنټان او ډلې ټپلې په افغانانو حاکمان کړي،چې دا افغانانو ته د منلو وړ نه ده. افغانان داسې ټولګډونه حکومت غواړي، چې کار اهل کار ته په کې وسپارل شي.»

ځينې په دې باوردي،چې افغان ولس د یوه داسې ملي حکومت جوړښت غواړي،چې ټول افغانان په کې ځان وګوري،خو هغه چې له بهره افغانستان ته د حکومتونو جوړښت څرنګوالي نسخې ورکوي، دا په ښکاره د افغانستان په کورنیو چارو کې لاسوهنه ده.

د سیاسي چارو کارپوه شهزاده مسعود وايي:« ځینې همسایه هېوادونه په افغانستان کې د پراخ بنسټه حکومت خبرې کوي،خو د افغانانو برحق غوښتنه په هېواد کې د یوه ملي حکومت غوښتنه ده،چې په کې ټول افغانان ځانونه وګوري او داچې له بهره د ټولګډونه حکومت خبره کیږي، دا دافغانستان په کورنیو چارو کې لاسوهنه ده.»

د سیاسي چارو کارپوه هاتف مختار بیا په دې اند دی،چې  ځینې هېوادونه له افغانستان سره په سیمه او ګاونډ کې پراته دي،هڅه کوي چې د ټولګډونه حکومت په نوم افغان ولس یو ځل بیا په قومونو او خیلونو وویشي او له رامنځ ته کیدونکې تشې دوي ګټه واخلي.

مختار زیاتوي:«هرهغه نسخه چې د ټولګډونه حکومت په نوم د پردیو استخباراتو له ادرسه مطرح کیږي، دا د افغانستان د ملي منافعو خلاف ده او دوی غواړي،چې افغانستان په قومونو وویشي.»

تازه د افغانستان لپاره د روسیې ځانګړي استازي ضمیر کابلوف ویلي، په افغانستان کې ټولګډونه حکومت د سیمې هېوادونو لپاره لومړیتوب دی او د افغانستان په تړاو د نړۍ تګلاره سمه نه ده.

کابلوف د دوحې کنفرانس،چې لس ورځې وړاندې  د افغانستان په تړاو قطر کې جوړ شوی و، بې پایلې یاد کړی،چې په وینا یې لویدیځ په دغه کنفرانس کې رغنده رول نه دی لوبولی.