افغانستان کې تېره اوونۍ د ملګرو ملتونو سیاسي استازولۍ (یوناما) خبر ورکړ،چې ننګرهار ولایت کې یې ښځینه کارکوونکې له دندو منع شوې دي.
د یوناما دې خبر د نړیوالو سخت غبرګونونه وپارول او ګڼو هېوادونو، سازمانونو او ادارو د دې پریکړې د بېرته اخېستو غوښتنه وکړه.
اروپایي ټولنې هم دغه پریکړه له تبعیض ډکه او د نړیوال قانون او اصولو سرغړونه یاده کړې او ویلي دي چې له امله به یې د ښځو او نجونو وضعیت نور هم خراب شي.
د اروپایي ټولنې بهرنۍ پالیسۍ مشر جوزېف بوریل وايي:« د طالبانو دا نوې تبعیضي پریکړه په افغانستان کې د ښځو او نجونو وضعیت نور هم خرابوي او د بشري حقونو د نړیوال قانون، د هغو تړونونو په ګډون چې افغانستان یې یو اړخ دی، د نړیوال بشردوستانه قانون او له بشردوستانه اصولو ښکاره سرغړونه ده. دا پریکړه ښځې په زیاتیدونکي زیانمن حالت کې اچوي او په مستقیم ډول به یې پر ژوند ګواښونکې پایلې ولري.»
بوریل له افغانستان سره د اروپايي ټولنې د مرستو د دوام ژمنه بیا تازه کړې،خو له اسلامي امارت یې غوښتي،چې پر ښځو او نجونو لګول شوي بندیزونه لرې کړي.
بوریل ویلي، د اروپایي ټولنې د پخوانیو ناستو او پریکړو له مخې، که د دوی مرستې د اروپايي ټولنې له اصولو سره سم او پرته له کوم تبعیض او جنسیتي توپیر ونه ویشل شي،نو پر خپل ملاتړ به له سره غور وکړي.
هغه زیاته کړې:« اروپايي ټولنه د یوې تګلارې له مخې د افغانانو د ګټو لپاره د خپلې ښکیلتیا او مرستو برخه کې د دوام ژمنه تازه کوي. موږ له طالبانو څخه غواړو،چې ښځو ته اجازه ورکړي،چې د مرستو او خدماتو په وړاندې کولو کې مساوي او مانا لرونکې برخه واخلي،ترڅو له مرستو برخمنې شي. لکه څرنګه چې له وړاندې ویل شوي که چیرې د اروپایي تولنې له اصولو سره سم مرستې دوام ونه کړي او د تبعیض او جنسیت په پام کې نیولو پرته نه وي، نو د دې فعالیتونو په دوام او ملاتړ به له سره غور وشي.»
اوس اندېښنې شته دي،چې نړیواله ټولنه به د دې پریکړو غبرګون کې خپلې مرستې کمې او یا هم بیخي بندې کړي،خو د افغانستان لپاره د ملګرو ملتونو د بشري مرستو همغږي کوونکي رامیز الکبروف پر نړوالو غږ کړی دی،چې افغانان دې دحساس وخت کې یوازې نه پریږدي.
الکبروف ویلي،افغانان له وړاندې سخت کړیدلې،نو اوس دې نړیواله ټولنه د خپلو مالي مرستو په بندولو سره هغوی نور نه ځپي.
الکبروف زیاته کړې:« نړۍ نه شي کولی،په دې نازک او حساس وخت کې افغانان یوازې پریږدي. په داسې حال کې چې موږ د دې فرمانونو د حل لپاره له طالب چارواکو سره خپلو خبرو ته دوام ورکوو. نو له نړیوالې ټولنې هم غوښتنه کوو،چې د خپلو مهمو او حیاتي مالي مرستو په بندولو سره افغان ولس نور ونه ځوروي . د افغانستان خلک له وړاندې زیامن شوي، نو دا به عاقلانه نه وي،چې د بشري مرستو په بې برخه کولو سره نور هم وځپل شي.»
نړیوالو په کراتو ویلي،ښځینه کار کوونکې د دوی د مرستو رسولو د ملا تیر دي او که پرې لګول شوي بندیزونه بېرته وانخېستل شي نو فعالیتونه به یې کم شي او میلیونونه افغانان به له مرستو بې برخې شي.
که څه هم ډېری افغانان د بهرنیو په مرستو د خپل ژوند چارې مخته وړي،خو لا هم اسلامي امارت د نړیوالو دې اندېښنو او ګواښونو ته کوم غبرګون نه دی ښودلی.
