د قره قل څرمنې یو بل سوداګر روح الله بیا وايي:« د اسلامي امارت له حکومته غواړو، چې صنعتکار او سوداګر ته سهولتونه برابر کړي او تر څنګ يې بايد د قره قل صنعت د بېرته پر پښو درېدو لپاره له صنعتکارانو سره مرسته وشي.»
په ورته مهال، شمال زون کې د قره قل تحقيقاتي انستيتيوت يو مسوول محمد عارف وايي، په ۱۴۰۰ لمريز کال کې تر دې مهاله له افغانستانه څه باندې ۲۷ زره قرقل څرمنې صادرات شوي او په وینا یې شااوخوا ۶۰ زره نورې څرمنې هم صادرولو ته چمتو دي.
محمد عارف زیاته کړه:« په روان لمريز کال کې تر دې مهاله د قره قل ۲۷۰۷۹ پوستکي صادر شوي او شااوخوا ۶۰ زره نور پوستکي هم صادرولو ته چمتو شوي، چې نړيوالې الوتنې شروع شي دا به هم صادر شي.»
صنعتکاران وايي، لسيزې وړاندې به له افغانستانه بهرنيو هېوادونو ته په کال کې څه باندې يو میليون قره قل څرمنې صادرات کېدل، خو اوس د صادراتو دغه شمېر په کال کې سل زره څرمنو ته هم نه رسېږي.
