د امریکا د پوځ لوی درستیز جنرال جوزف ډنفورډ ویلي، که څه هم طالبانو د سرتېرو د وتلو غوښتنه کړې ده خو لا هم افغانستان کې د ترهګرۍ پر وړاندې د امریکا مبارزه کم زورې شوې نه ده.
په داسې حال کې چې ټاکل شوې د امریکا او طالبانو د سولې خبرو بل پړاو نږدې راتلونکي کې پیل شي، ډنفورډ ویلي، افغانستان کې یې حضور تر اوسه تر بحث لاندې نه دی نیول شوی.
ډنفورډ ویلي، تراوسه هېچا هم وړاندیز نه دی کړی چې امریکايان دې له افغانستان څخه په داسې حال کې ووځي چې د ترهګرۍ پر وړاندې د مبارزې ګټې یې خوندي نه وي.
ډنفورډ ټینګار کړی چې لا تراوسه هم د ترهګرو پر وړاندې یې مبارزه کمزورې شوې نه ده.
د ډنفورډ دغه څرګندونې داسې مهال کېږي چې مسکو په دویم ځل د افغان سیاسیونو او طالبانو د خبرو کوربه دی.
