د لوی مشورتي جرګې رابللو ته چمتووالی روان دی.
د سولې عالي شورا د لوی مشورتي جرګې په جوړښت بوخته ده چې د افغانستان ټول اقشار پکې ګډون ولري.
لویه جرګه کې د ګډون لپاره طالبانو ته هم بلنه ورکول کیږي چې د سولې په بحث کې ګډون وکړي.
که څه هم ځینې ګوندونه د مشورتي جرګې په جوړښت باندې نیوکه لري، خو د سولې شورا کار کوي چې ستونزې له مخې پورته او داسې جرګه برابره کړي چې ټولو ته د قناعت وړ وي.
له سولې شورا تمه ده چې جرګې ته به داسې کسان وغواړي چې خپلواکه او بې طرفه مشورې ورکړي.
لویه مشورتي جرګه چې د سولې په تړاو به بحث او مشورې وکړي، د کب په شپږویشتمه به پيل شي او ممکن درې ورځې دوام پيدا کړي.
سولې شورا دې جرګې ته په چمتووالي بوخته ده چې په هېواد کې د بیلابیلو اقشارو د ګډون تر څنګ طالبانو ته هم بلنه ولیږي.
مشورتي جرګې د جوړښت لپاره کمېسیون ټاکل شوی او کار کوي چې څنګه کیدای شي، بې طرفه او وړ کسان جرګې ته ور وبلي چې د سولې په تړاو مشورې ورکړي.
خو ځینې سیاسي ګوندونه سر له اوسه د دې جرګې په جوړښت باندې ملاحظات لري.
د مشورتي جرګې په تړاو د خلکو په ټاکنه باندې هم اندیښنې شته چې ګنې حکومت به هڅه وکړي خپل پلوي کسان جرګې ته وبولي او نور کسانو ته بلنه ور نه کړل شي.
ولسمشر غني وروسته له هغې د مشورتي لویې جرګې د رابللو لارښوونه وکړه چې د سولې په تړاو له طالبانو سره مهم بحثونه روان دي او تمه شته چې طالبان به له افغان حکومت سره د مخامخ خبرو تر څنګ اوربند باندې هوکړه وکړي.
طالبان له افغان حکومت سره په خبرو او سوله کې غوښتنې لري او ولسمشر به لوی جرګې څخه وغواړي چې د سولې لپاره کوم قیمت ته حاضر دي.
