د افغان سولې لپاره د امریکا استازي زلمي خلیلزاد ویلي چې تر اوسه د بهرنیو ځواکونو اېستلو لپاره هېڅ ډول مهالوېش نه دی ټاکل شوی.
امريکا په راتلونکو شاوخوا دوه میاشتو کې خپل نیمایي ځواکونه له افغانستان باسي.
په مسکو کې د طالب مرکچي پلاوي یو غړي مولوي عبدالسلام حنفي ویلي، امريکا ورسره منلې چې له افغانستانه به خپل نيمايي ځواکونه وباسي.
د حنفي په خبره، له افغانستان د بهرنیو ځواکونو وتل به سر له روانې عیسوۍ میاشتې پیل شي.
دغه طالب پلاوي ویلي، امريکا ورسره منلې چې د پوځيانو نيمايي شمېر به د فبرورۍ د مياشتې له لومړۍ د اپرېل مياشتې تر پاى پورې له افغانستانه وځي او بیا به له تخنيکي ټیم سره
کېني او د پاتې پوځيانو د وتلو لپاره به هم مهالوېش ټاکي او له افغانستان به وځي.
مسکو کې د افغان سیاسیونو او طالبانو ناستې
له دوه ورځو خبرو اترو وروسته د مسکو غونډه په ګډې اعلامیې پای ته ورسېده.
په ګډه اعلامیه کې ویل شوي چې د غونډې ګډونوال باور لري د بین الافغاني خبرو په پایله کې افغانستان کې تلپاتې او با عزته سوله راتلای شي.
دغه راز ګډونوالو په قطر کې د سولې د روانو خبرو ملاتړ کړی او زیاته کړې یې ده چې دا ډول بین الافغاني ناستې د افغان سولې په بهیر کې اړینې دي او دوام به کوي.
دواړو لوریو د سولې د هوکړې په صورت کې ټینګار کړی چې د افغانستان دفاعي او نور بنسټونه به خوندي وي، خو اصلاحات به پکې راوستل کېږي.
اعلامیه کې ویل شوي چې د نظام په ټولو چارو کې به د اسلامي اصولو پیروي کېږي.
د بهرنیو ځواکونو وتل، افغانستان کې چاته د لاسوهنې اجازه نه ورکول، د افغانستان خاوره د نړیوالې ټولنې په ضد نه کارول، زده کړې، کار، روغتیا او نورو برخو کې د ښځو حقونه د اسلامي
اصولو په چوکاټ کې خوندي کول، نړیوالې مرستې ارزول، هغه بندیان خوشې کول چې سپین ږیري یا ناروغه دي او یا یې د بند موده کمه پاتې ده او دغه راز د طالب مشرانو نومونه له تور
لېسته ایستل نور هغه مهم ټکي دي چې په ګډه اعلامیه کې خپاره شوي دي.
