د افغانستان د سولې خبرو لپاره د امریکا متحده ایالاتو بهرنیو چارو وزارت ځانګړی استازی زلمی خلیل زاد په دریم سفر د سیمې هېوادونو په دوره ووت.
خلیل زاد به د افغانستان، چین، پاکستان او هندوستان هېوادونو ته سفر ولري او د ا فغان سولې په تړاو به خبرې اترې وکړي.
د خلیل زاد دا سفر د تیر هغه په څیر نه دی، دا ځل خلیل زاد قطر او متحده عربي اماراتو ته نه ځي.
د خلیل زاد د سفر بل مهم اړخ دادی چې دا ځل په دې کار کیږي څو مخامخ د افغانانو ترمنځ د سیاسي حل لپاره خبرو اترو ته لار اواره شي.
قطر کې د طالبانو او خلیل زاد ناسته
په قطر کې د طالبانو او امریکا ترمنځ د خبرو اترو غونډه د ځينو اختلافونو له امله لغوه شوې.
ټاکل شوې وه چې نن او سبا په قطر کې د طالبانو او امریکایي استازو ترمنځ د روغې جوړې خبرې وشي خو طالبانو ویلي، له امریکا سره د دې غونډې د اجنډا د موضوعاتو پر سر د اختلافونو له امله یې لغوه کړه.
یوې طالب سرچینې رویټرز خبري اژانس ته ویلي، طالبانو او امریکا د افغان چارواکو د ګډون، د احتمالي اوربند اعلانولو او د بندیانو د تبادلې په اړه اختلافات درلودل.
کابل کې د امریکا سفارت هم له طالبانو سره د قطر غونډې د لغوه کېدو خبره منلې ده.
کابل کې د امریکا سفیر جان باس ویلي، څومره چې طالبان له رسنیو سره خبرې کوي، همدومره دې له افعان حکومت سره هم وکړي.
د طالبانو غوښتنې
طالبانو له امریکا غوښتنه کړې چې، ۲۵ زره طالب بندیان خوشې کړي چې په بدل کې به یې دوی هم درې زره بندیان خوشې کړي.
خو طالب سرچینې وایي، امریکا په اوس وخت کې لېواله نه ده چې د بندیانو پر تبادلې بحث او خبرې وکړي.
طالبان داسې احساس کوي چې، د افغانستان د سولې لپاره د امریکا د بهرنیو چارو وزارت ځانګړی استازی زلمی خلیل زاد د دې صلاحیت نه لري چې د موضوعاتو په اړه مهمې پرېکړې وکړي.
ځینو طالب سرچینو بیا ویلي، هېڅکله به هم اوربند اعلان نه کړي، تر څو د جګړې په اړه یې خپلې اساسي غوښتنې پوره شوې نه وي.
