د ولسي جرګې غړي وايي، امریکایان د خپلو ګټو او اهدافو لپاره افغانستان ته راغلي.
د ولسي جرګې ځینې غړي وایي، امریکا ته له پیله د افغانستان ګټې مهمې نه، بلکې د خپلو ګټو لپاره راغلې وه او خپلې ګټې ورته اهمیت لري.
دوی وایي، دا چې امریکا خپل ځواکونه له افغانستان باسي، نو باید د افغانانو قرباني هم هیره نه کړي.
وکیلان نیوکه کوي چې امریکا د افغانانو پر وړاندې خپل مسؤلیت په سمه توګه نه دی ترسره کړی او هر څه یې نیمګړي پرېښي دي.
له دې سره د ولسي جرګې غړې صادقي زاده نیلي پر امریکا نیوکه کوي، چې له پیله ورته د افغانستان ګټو اهمیت نه درلود او یوازې د خپلو ګټو لپاره راغلې وه.
د ولسي جرګې رییس عبدالرؤف ابراهیمي وایي، د امریکایانو وتلو خلکو ته اندېښنې پیدا کړي، خو ځینو وکیلانو بیا د بهرنیو ځواکونو وتل د سولې لپاره یو نیک ګام وباله او غوښتنه یې دا وه چې باید په کور دننه همغږي او واحد نظر شتون ولري.
د امریکا دفاع وزارت له افغانستانه د اووه زره ځواکونو د وتلو په اړه غور کوي.
پنټاګون ویلي؛ ولسمشر ټرمپ له سوریې وروسته په دې غور کوي چې په افغانستان کې هم د خپلو پوځیانو شمېر نمایي ته راکم کړي.
افغان حکومت وایي، د بهرنیو ځواکونو وتل د افغانستان د امنیت پر وضعیت بد اغېز نه شي کولای.
د امریکا د دې احتمالي پلان پر اساس په پام کې ده چې له افغانستان څخه تر راتلونکي اوړي پورې اووه زره پوځیان وایستل شي.
طالبانو هم د سولې خبرو لپاره لومړی شرط د بهرنیوځواکونو وتل په ګوته کړي دي.
