پاکستان د اماراتو په غونډه کې له طالبانو غوښتي چې په افغانستان کې د امریکایانو دوه پوځي اډې ومني.
پاکستان په غیر مسقیم ډول له طالبانو غوښتي چې په افغانستان کې د امریکا دوه پوځي اډې ومني خو تر اوسه په دې اړه طالبانو څه نه دي ویلي خو دا یې تایید کړې چې له امریکا سره د سرتېرو په وتلو او هوایي بریدونو په درولو یې خبرې کړي دي.
د متحده عربي اماراتو ناسته له ټولو تېرو هغو ګټوره بلل کیږي، خو طالبانو د افغان حکومت له مذاکراتي پلاوي سره نه دي کتلي.
طالبانو تېر ورځ په متحده عربي اماراتو کې، د امریکا، پاکستان، سعودي عربستان او متحده عربي اماراتو له استازو کتلي خو له امریکا سره یې نن ورځ هم ځانګړې ناسته درلودله.
د متحده عربي اماراتو ناسته له دې امله د سولې لپاره ګټوره بلل کیږي چې پاکستان هم په کې ګډون کړی وو.
د طالبانو له لیکو باخبره کسان وايي، پاکستان له طالبانو له غیر مستقیم ډول د امریکایانو لپاره د دوو پوځي اډو غوښتنه کړې.
طالبانو دا موضوع تر اوسه نه ده تایید کړې، خو وايي، دوی له امریکایانو سره د بهرنیو ځواکونو په وتلو او وروستیو خونړیو هوايي بریدونو چې ملکیانو ته تلفات اړوي، په درېدو خبرې کړي دي.
د پاکستان لومړي وزیر عمران خان د متحده عربي اماراتو ناستې برابریدو امتیاز پاکستان ته ورکړی دی.
عمران خان داسې ویلي ((د امریکا او طالبانو تر منځ مخامخ مذاکراتو لپاره پاکستان لاره هواره کړې ده. خدای دې وکړي چې د سولې دغه خبرې په افغانستان کې د درېیو لسیزو جګړې ته د پای ټکی کېږدي. زه ډاډ ورکوم چې پاکستان به د افغان سولې بهیر کې د هڅو لپاره له خپل ټول وس کار واخلي))
د سولې عالي شورا هم روانو هڅو هیله منده کړې او رامنځته شوی وضعیت د سولې ټینګښت لپار طلايي ګڼي.
د افغان حکومت مذاکراتي پلاوی هم په متحده عربي اماراتو کې دی، له زلمي خلیلزاد، سعودي ، پاکستاني او متحده عربي اماراتو له استازو سره یې د لیدو او هم کېدو خبر تایید کړی خو له طالبانو سره یې د لیدو په اړه څه نه دي ویلي.
