د ملا عبدالمنان وژنې د طالبانو لیکې کمزورې کړي.
ملي دفاع وزارت وایي، هغه په سویل لویدځه حوزه کې د طالبانو مهم قومندان و چې جګړه یې رهبري کوله.
طالبانو د ملا منان د وژنې په غبرګون کې بیا ویلي، چې له جګړې لاس نه اخلي او د هغه د وژل کېدو وروسته به طالبان نور هم غښتلي شي.
پوځي کارپوهان وایي، د کلیدي کسانو وژل کېدل یوازې د وسلوالو روحیه کمزورې کوي خو د جګړې له کمښت سره مرسته نه شي کولای.
په امریکایي برید کې هملند لپاره دا والي تېره ورځ ووژل شو.
د طالبانو د مخیکني مشر ملا منصور وروسته ملا منان د طالبانو بل مهم کلیدي غړی وو.
هغه د ۲۰۰۵ کال را په دې خوا د هلمند لپاره د طالبانو والي و، چې د خپل مسؤلیت په وخت کې یې د دې ولایت ډیره خاوره بهرنیو او کورنیو دولتي سرتېرو لپاره نا آرامه کړې وه.
اوس چې هغه وژل شوی ددفاع وزارت ویاند غفور احمد جاوید باور لري چې د طالبانو لیکې به ورسره خورا کمزورې شي.
د ملا عبدالمنان په شتون کې طالبان وتوانېدل تر نیمايي زیات هلمند ونیسي او په پاتې سیمو کې خپل نفوذ ډېر کړي.
د هغه له لاسه ورکول په پوځي لحاظ طالبانو ته یوه پوځي تشه ده خو د جګړې په کمېدو کې مرسته نه شي کولای.
طالبانو په یوه اعلامیه کې ویلي، چې د ملا عبدالمنان وژنه به دوی له خپل دریځ په شا نه کړي.
د طالبانو د مهمو غړو په وژل کیدو تر اوسه ددغې ډلې په پوځي فعالیتونو کې داسې ښکاره څه نه دي لیدل شوي چې جګړه دې ور سره کمه او یا دې هم طالبان کمزوري شي.
د ۲۰۱۷ز کال کې د کندز لپاره د طالبانو والي، ملا عبدالسلام اخند، هم د امریکايي ځواکونو په یوه هوايي برید کې وژل شوی و هغه څېره چې ۲۰۱۵ او ۲۰۱۶ کال کې یې کندز ښار دوه ځله سقوط کړ.
