د ټاکنیزو شکایتونو کمېسیون د یو شمېر ولایتونو د ټاکنو لومړنیو پایلو ته په کتو وايي، ممکن په پایلو کې بدلون راشي.
شکایتونو کمېسیون د نوماندانو اعتراضونو ته د رسېدو تر څنګ له ټاکنو کمېسیون غواړي چې د لومړنیو پایلو بایومتریک او له بایومتریک پرته د رایو مالومات ورکړي.
له دې سره سیاسي جریانونه خبرداری ورکوي چې تر اوسه دوی ته د کمېسیون کړنې د منلو نه دي او له بایومتریک پرته رایې له درغلیو ډکې دي.
ټاکنو کمېسیون د لومړنیو پایلو د اعلان لپآره په دویمه ټاکل شوې نېټه هم ونه توانېد چې د ټولو ولایتونو لومړنۍ پایلې اعلان کړي.
اوس چې کمېسیون د یو شمېر ولایتونو د ټاکنو لومړنۍ پایلې اعلان کړې، د نورو لا هم کره نېټه نه ده مالومه.
په ټاکنو د څار بنسټونه د کمېسیون لخوا د یو شمېر ولایتونو د لومړنیو پآیلو اعلان د خلکو د تېر اېستلو لپآره بولي چې له نیوکو خلاص شي.
د ټاکنو کمېسیون لخوا د د لومړنیو پایلو له اعلان وروسته د شکایتونو کمېسیون کار دی چې شکایتونه وڅېړي. شکایتونو کمېسیون وايي د شکایتونو له څېړنو ممکن په پایلو کې بدلون راشي.
له دې سره د ټاکنیزو شکایتونو کېسیون له ټاکنو کمېسیون غواړي چې لومړنیو پایلو کې د بایومتریک او نا بایومتریک رایو مالومات ورکړي.
د بایومتریک او نا بایومتریک رایو پر سر اوس هم د ټاکنو کمېسیون او سیاسي احزابو ناندرۍ دوام لري، سیاسي احزاب ټینګار کوي چې یوازې بایومتریک رایو ته دې اعتبار ورکړل شي خو کمېسیون ته لومړیتوب د رای ورکوونکو لیست لري.
د هغه ولایتونو چې لومړنۍ پایلې یې اعلان شوي، معترض نوماندان دوه ورځې وخت لري چې د لومړنیو پایلو په تړاو د ټاکنیزو شکایتونو کمېسیون کې شکایتونه ثبت کړي.
