په خیبر پښتونخوا کې یو ځل لسګونو زرو پښتنو د پاکستان د ریاست خلاف غونډه وکړه.
په دغې غونډه کې د پښتون ژغورنې غورځنګ لسګونو مشرانو هم ګډون کړی و.
د پښتنو احتجاج وروسته له هغې پیل شو چې د پاکستان ریاست او پوځ د پښتنو ځورولو ته دوام ورکړ.
د دغه غورځنګ مشرانو یو ځل بیا خبرداری ورکړی چې د تاریخ په اوږدو کې ځورول شويو قومونو ازادي اخېستې او ریاست دې نور د پښتنو له ځپلو لاس واخلي.
د پاکستان حکومت له خبرداریو سربېره بیا هم د خیبر پښتونخوا بنو ښار ته د لسګونو زرو پښتنو له شوره ډک سمندر ور وبهېد او د پنجاب ریاست خلاف یې غږ پورته کړ.
د بنو سترې غونډې ته د پښتنو د اوسني عصر ملالې او د پښتوی ژغورنې غورځنګ نور غړي کوڅه په کوڅه او کور په کور وګرځېدل چې پښتنو ته د راپېښو بدبختیو خلاف راپورته شي.
په بنو کې راغونډو شویو پښتنو د پاکستان ریاست خلاف غونډه په اتڼونو پیل کړه او د خپلو نیکونو هغه دود یې تازه کړ چې د هر باغي خلاف جګړې ته به له زغرو او تورو تر څنګ اتڼونو سره ورتلل.
د پاکستان ریاست له کلونو راهېسې هغو پښتنو ته هم د سر په کاسه کې اوبه ورکړي چې پر خپله خاوره یې سوله غوښتله او د عدم تشدد غږ یې پورته کړی دی.
له کلونو راهېسې د زرګونو پښتنو کورونه ویجاړېږي، ښوونځي او روغتونونه یې ړنګېږي او ډېر شمېر ځوانان یې د تورو تمبو شا ته پراته دي.
میاشتې وړاندې په اسلام اباد کې د پښتون ژغورنې غورځنګ پرلت په دې شرط پای ته ورسېد چې د پاکستان حکومت به د غورځنګ غوښتنې پوره کوي، خو هغسې و نه شول.
د پښتون ژغورنې غورځنګ یو مشر وايي، د تاریخ په اوږدو هغو قومونو ته چې حقوق نه دي ورکړل شوي، بالاخره یې د خپلواکۍ لپاره لستوڼي بډ وهلي دي.
له دې سره د پښتون ژغورنې غورځنګ مشر منظور پښتون یو ځل بیا له پاکستانه غوښتي چې د پښتنو قاتل راو انور دې محاکمه شي او بندیان دې یې راخوشې کړي.
موده وړاندې د غورځنګ فعال غړي حیات پریغال، ګلالۍ اسماعیل او سپین ږیری فیض محمد کاکا سربېره لسګونه نور پښتانه هم په دې جرم زنداني شوي وو چې د پښتنو په ننګه یې د حق غږ پورته کړی و.
