په ننګرهار کې د تیرې ورځې د برید د قربانیانو شمېر۲۱ تنو ته ورسېد.
د ننګرهار د ولایتي شورا غړي ناصر کاموال ويلي، په کامې ولسوالۍ کې د تیرې ورځې په ځانمرګي برید کې ۲۱ کسان وژل شوي او تر ۴۰ زیات ټپيان دي.
چارواکي وایي، ځانمرګی برید ګر پلې و او د ولسي جرګې ټاکنو ته د یوه نوماند په د فتر کې یې غرمه مهال ځانته چاودنه ورکړه.
ولایتي اداره وایي، دوی ته د غونډې په اړه خبر نه و ورکړل شوی.
له دې سره د ننګرهار ولایتي شورا مشر احمد علي حضرت وایي، هلته چارواکي د امنیت په راوستو کې ناکام دي، چې له امله یې، په څلور میاشتو کې ۹۰۰ ملکي وګړو ته مرګ ژوبله اوښتې.
ملګري ملتونه :
ملګرو ملتونو ننګرهار کې د تېرې ورځې برید غندلی.
افغانستان کې د ملګرو ملتونو ځانګړي استازي تدامیچي یاماموتو په یوې اعلامیې کې ویلي چې د هغو کسانو په نښه کول چې غواړي په ټاکنو کې ګډون وکړي د اندېښنې وړ دی.
یاماموتو همداراز په ټینګار سره د جګړې له ښکېلو غاړو غوښتي چې د ټاکنو په تړاو دې تاوتریخوالي ته د پای ټکی کېږدي.
داعش هم د دغه برید پړه منلې ده او د لسګونو کسانو د مرګ ژوبلې ادعا یې کړې ده.
ولسمشر هم ننګرهار کې د تېرې ورځې برید وغانده.
ولسمشر محمد اشرف غني د ننګرهار د تیرې ورځې ځانمرګي برید ته په اشارې ویلي، د افغانانو دښمنان د ولس له بیدارۍ ویره لري او هڅه کوي د ترهګریزو بریدونو له لارې ددغه بهیر مخه ونیسي.
ولسمشر ویلي، د افغانستان د ولسواکۍ دښمنان او بهرني ملاتړي یې نه غواړي چې افغانان د قانون سره سم ډیموکراتیک میکانیزم له لارې خپل استازي وټاکي.
