کندهار کې بڼ لرونکي: سږ کل مو انګور د وچکالۍ له امله سخت زیانمن شوي 

په کندهار ولایت کې د انګورو د حاصلاتو ټولول پیل شوي دی، خو بڼوال ترې خوښ نه دي.

هلته د انګورو بڼ لرونکي وايي،سږکال يي تر ټولو کلونو د انګورو حاصل کم دی او د کال کړې خوارې يې نه پوره کوي.

دوی وايي،د وچکالۍ له کبله يي ټول کال د تیلو پر مټ له ژورو برمو اوبه رایستلي او په ډېرو زحمتونو يي بڼوڼه اوبه کړ، خو اوس هم د پخوا پرتله درېیمه برخه حاصل نه لري.

بڼوال اندیښمن دي که وچکالي دوام وکړ،نو باغونه يي د وچیدو له ګواښ سره مخ دي.

یو تن بڼوال نور محمد وايي:« ستونزه مو د وچکالۍ له امله ده. بڼ ته مو اوبه نه شته دی. د برمو له څاګانو یې اوبه کوو. ته یې ګورې،چې کومو ستونزو سره مخ یو. انګور مو وګوره، په دې شکل شوي دي. هغو انګورو ته چې اوبه ورسېدلي، حاصلات یې ښه دي،خو هغو انګورو ته چې اوبه نه دې رسېدلي وچ شوي دي.» 

د کندهار ژړۍ، پنجوايي ارغنداب، ارغستان ډنډ، دامان، معروف او خاکریز هغه ولسوالۍ دي،چې په کې د انګورو باغونه شته او د ډېری اوسېدونکو يي یوازینۍ د عاید سرچینه همدا باغونه دي.

په دغو ولسوالیو کې باغونه د دهلې اوبو له بنده اوبه کیږي،چې د اوبو کمیدو سره ډېری وخت کروندګر د اوبو له کمښت سره مخ  کیږي.

باغ لرونکي همدراز وایي،دولت دې  نړيوالو بازارونو ته د تازه مېوو د رسېدو په برخه کې هڅې وکړي او د دوی حاصلاتو ته دې بازار پیدا کړي.

دوی وايي،د سړو خونو او بازار د نشت له امله اړ دي،چې خپل حاصلات په کمه بېه او زيان وپلوري.

یو بل بڼ لرونکي  اختر محمد بیا وايي:«دولت باید له موږ سره مرستې وکړي. دا ټول انګور خو دلته نه خوړل کېږي، باید نورو هېوادونو ته یې د لېږد زمینه برابره کړي.»  

په ورته وخت کې د کندهار  کرنې ریاست مشر مولوي محمود مظلوم واي، په دغه  ولایت کې به سږکال د وچکالۍ له امله د انګورو پر ۲۰ زره او ۵۰۰ هکټاره ځمکه ۲۵۱ زره ټنه د انګورو حاصل تر لاسه شي،چې د تیر کال پرتله اته فیصده کموالی ښيي.

مظلوم زیاتوي:« د انګورو حاصلات سږ کال د تېر پرتله ۸ سلنه کم دی. سږ کال وچکالي ده، بڼوڼه د اوبو له کمښت سره مخ دي. اوبه ډېرې کمې دي.» 

انار، انګور او انځر د کندهار مشهورې میوې دي،چې تر ډېره بهرنیو هېوادونو ته صادریږي او د بڼ لرونکو او کروندګرو یوازینۍ د ګټې وټي سرچینه د، خو هر کال د مرضونو وچکالۍ او د صادراتو پر وړاندې مخ کیدونکو ستونزو له کبله بڼ لرونکي، کروندګر او سوداګر زیانمن کیږي.