واک ته د اسلامي امارت له رسېدو وروسته تر ډېره پر کورنیو تولیداتو او داخلي پانګونې ټینګار کېږي چې ورسره په بېلا بېلو برخو کې د کورنیو تولیداتو کچه هم لوړه شوې.
د یوې نوې هڅې په ترڅ کې د کندهار په ارغنداب ولسوالۍ کې د شپږ نیم میلیونه امریکايي ډالرو په پانګونې سره د هګیو تولید یو تازه فارم جوړ شوی چې هره ورځ شاوخوا۷۰ زره د چرګانو هګۍ تولیدوي.
د دې فارم مسوولین وایي، د هېواد په بېلابېلو ولایتونو کې یې د فارمي چرګانو او هګیو د تولید په برخه کې تر۱۵۰ میلیون ډالرو پانګونه کړې چې یوازي کندهار کې له دې نورو فارمونو څخه هر ورځ ۳۵۰ زره هګۍ بازار ته وړاندې کوي.
د فارم مسوول محمد اغا وايي: « موږ دلته د ۶ میلیون امریکايي ډالرو په ارزښت پانګونه کړې او تر ۱۱۵ تنو پورې مو خلکو ته د کار زمینه برابره کړي. اوسمهال په ورځنۍ کچه له ۳۰۰ تر ۳۱۵ کارتنو تولید لرو، خو دا کچه مخ په زیاتېدو ده.»
د فارم کارکوونکی محمد هاشم وايي: « زه دلته د هګیو په برخه کې کار کوم. دلته دوه وخته هګۍ تولیدېږي او بیا له کندهار سربېره، کابل او هرات ولایتونو ته هم استول کېږي.»
دغه راز، د کندهار مالدارۍ آمریت د پراختیا څانګې مسوولین وایي، اوسمهال کندهار کې د غوښنو او هګيو لرونکو چرګانو شاوخوا۱۲۰۰ فارمونه شته چې ډیری یې د مالدارۍ چوکاټ کې پر وړاندیز شویو معیارونو برابر دي.
د کندهار د مالدارۍ آمریت د پراختیا مدیر ډاکټر توریالی قریشي وايي: « له دې وړاندې موږ ډېر واردات لرل، ځکه خپل فارمونه مو کم وو. اوس د تجارانو په خوارۍ سره تر ۱۲۰۰ پورې فارمونه لرو او ډېرو یې د تولید کچه په معیار برابره ده.»
په ورته وخت کې د کندهار کرنې، اوبو لګولو او مالدارۍ ریاست مسوولین وایي، دا مهال کندهار کې د چرګانو فارمونو څخه هره ورځ شاوخوا ۴۰۰ زره هګۍ او شاوخوا ۶۵زره کیلو د چرګانو تازه غوښه تولید او بېلابېلو ولایتونو ته استول کېږي. د دوی په خبره، یاده برخه کې ځان بسایني ته نږدې شوي دي.
د کندهار کرنې، اوبولګولو او مالدارۍ ریاست ویاند محمد حنیف حقمل وايي: « کندهار کې په ورځنۍ بڼه شاوخوا ۴۰۰ زره هګۍ تولیدېږي او ترڅنګ یې له ۶۰ تر ۶۵ زرو کیلوګرامو پورې د چرګانو غوښه هم تولیدېږي. د ځان بسیاینې په برخه کې باید ووایم چې تقریبا ً ځان بسیاینې ته نږدې شوي یو. موږ د چرګانو د غوښو په برخه کې نورو ته اړتیا نه لرو او د هګیو په برخه کې هم زموږ ډېره اړتیا پوره ده او پاتې نوره هم ورځ تر بلې په پوره کېدو ده.»
د یادونې وړ ده چې تردې مخکي کندهار ته له پاکستان او ایران څخه د چرګانو غوښي او هګۍ واردېدې او د کورنيو هغو په پرتله یې نرخونه هم لوړ وو.
