په کندهار کې د ګول سیخونو، ګاډرو، انګلارنو او نورو اوسپنیزو ساختماني توکو د تولید څو فابریکې فعالیت لري..
د دې فابریکو له ډلې د ګول سیخونو یوه تولیدي کارخونه په ۲۴ ساعتونو کې شاخوا۴۰ ټنه سیخ تولیدوي او نږدې ۱۵۰ کسانو ته یې د کار زمینه برابره کړې.
د فابریکې مسوولین وایي، که د اړتیا وړ برېښنا ورته برابره شي، نو تولیدات به یې لا زیات شي.
د فابریکې مسوول تورجان فضلي وايي: « سره له دې چې موږ د برېښنا له کمښت سره مخ یو، خو بیا هم په ورځ کې د ۶۰ ګرېډ سټنډرډ له مخې، له ۴۰ تر ۵۰ ټنو تولید لرو. له موږ سره ۱۵۰ تنه کارکوونکي کار کوي، خو که د برېښنا ستونزه هواره شي، موږ کولی شو تر ۳۰۰ تنو جذب کړو. له حکومت غوښتنه کوو چې د کافي برېښنا زمینه برابره کړي.»
له بلې خوا، د کندهار د صنعت او کانونو خونه وایي، سوېلي حوزه د ګول سیخونو په تولید کې ځان بسیاینې ته رسېدلې او په کندهار کې تولیدېدونکی ګول سیخ او ګاډر، له نړیوالو معیارونو سره سم جوړېږي.
د مسوولینو په خبره، ټاکل شوې په راتلونکو اتو میاشتو کې فابریکو ته کافي برېښنا برابره شي.
د صنعت او کانونو خونې مسوول سید سرور اماني وايي: « د برېښنا ستونزه په ټول افغانستان کې شته ده، خو په ځانګړې توګه کندهار کې ځکه زیاته ده چې موږ دلته وارداتي برېښنا هم نه لرو. له نېکه مرغه زه ستاسو د رسنۍ له لارې دا زېری ورکوم چې د مسوولینو د ژمنې له مخې به موږ راتلونکو اتو میاشتو کې په کندهار کې له اړتیا ډېره برېښنا ولرو.»
په دې فابریکو کې کارکوونکي له خپل کار څخه خوښ دي او وایي، که حکومت صنعتکارانو ته نورې اسانتیاوې برابرې کړي، نو ډېر خلک به د صنعت په برخه کې په کار بوخت شي.
هغوی همداراز له سوداګرو غواړي چې نورې فابریکې هم جوړې او فعالې کړي.
کارکوونکی عبدالحکیم وايي: « زه ډېر خوښ یم چې د خپل کور ترڅنګ، په مزدورۍ بوخت یم. موږ هیله لرو چې دا ډول کارونه نور هم ډېر شي، ترڅو زموږ په څېر نور وزګار خلک هم له کار برخمن شي.»
کارکوونکی شریف الله وايي: « زه ډېر خوشاله یم چې دلته راته د کار زمینه برابره شوې. زه له خپلو پانګوالو خواهش کوم چې دا ډول کارخانې ډېرې جوړې کړي او نورو ځوانانو ته هم د کار او خوارۍ زمینه برابره کړي.»
په تېرو دوو لسیزو کې د افغانستان صنعتکاران له ګڼو ستونزو او ننګونو سره سره په دې بریالي شوي چې د هېواد یو شمېر اساسي اړتیاوې په کور دننه تولید کړي، خو د برېښنا کمښت او د مناسب ځای نه شتوالی لا هم د صنعت د ودې پر وړاندې له لویو خنډونو څخه شمېرل کېږي.
