که څه هم په هېواد کې د ژمي فصل دی او د درنو واورو ورښت پیل شوی، خو د ټاپي ګازو نل لیکې غځولو پروژې چارې په پوره چټکۍ سره روانې دي.
د هرات ځایي چارواکي وایي، د ګاز لېږدونې د دې نل لیکې غزولو لپاره تر دې دمه ۹۱کیلومټره سیمه چمتو شوې او د دې سیمې په اوږدو کې یو شمیر کاري کمپونه هم جوړ شوي دي.
د دوی په خبره، تمه ده چې د دې پروژې چارې د روان میلادي کال تر پایه هرات ښار ته را ورسېږي.
د هرات والي ویاند محمد یوسف سعیدي وايي: « د ټاپي پروژې کار د اسلامي امارت د مسوولینو په هڅو په ډېره چټکۍ او جدیت سره ادامه لري. تر اوسه د پروژې ۹۱ کیلومټره د پایپ غځولو لپاره چمتو شوی او د چمتو شوي پلان له مخې به د ۲۰۲۶ کال تر پایه، هرات ولایت ته را ورسېږي.»
افغانستان کې د ټاپي پروژې د پلي کولو عملي چارې د ۲۰۲۴ زېږدیز کال د سپټمبر په ۱۱ نېټه د اسلامي امارت د رییس الوزرا ملا محمد حسن اخوند او د ترکمستان د ولسمشر قربان قلي بردي محمدوف له خوا په رسمي توګه پرانستل شوې.
د همدې کال د ډسمبر په ۱۶ نېټه د اسلامي امارت بهرنیو چارو وزیر مولوي امیر خان متقي او د هغه ترکمن سیال په افغانستان کې دننه د ټاپي پروژې پلې کولو چارو پرمختګ څخه لیدنه وکړه. د کارپوهانو په باور، ټاپي پروژه د افغانستان لپاره سټراټیژیک اهمیت لري او په پلي کېدو سره به یې افغانستان د ګازو د ټرانزیټ له پلوه دومداره عاید ترلاسه کړي.
د دوی په خبره، د دې پروژې له درکه دایمي عایدات د اقتصادي ودې ترڅنګ د انرژۍ په برخه کې هم د سېمې اړیکې پیاوړې کولی شي او افغانستان به په کې د سیمه ییزو اقتصادي همکاریو په مرکز بدل شي.
د چارو شنونکی علي احمد احمدي وايي: « که دا پروژه روانه وي او د افغانستان له پولو تېره شي، هغه ښارونه به یې له مادي ګټو برخمن شي چې د دې نل لیکې په اوږدو کې پراته دي. همدارنګه زموږ ګڼ هېوادوال به په کارونو بوخت شي، د هېواد اقتصادي ودې ته به زمینه برابره شي او افغانستان به نورو هېوادونو ته د ګازو ټرانزیټ له پلوه، عاید ترلاسه کړي.»
په همدې حال کې د هرات اوسېدونکي د ټاپي پروژې په پلې کولو کې د روان پرمختګ هرکلی کوي او وایي، دا پروژه د هرات ولس د اوږدې مودې هیله وه. دوی هم د دې پروژې له لارې په افغانستان کې اقتصادي ودې او د کاري فرصتونو برابرېدو ته خوشبین دي.
د هرات اوسېدونکی صبغت الله وايي: « ټاپي یوه حیاتي پروژه ده او د هرات خلکو ته یې ډېرې خوښۍ راوړې دي. له دې پروژې له ټرانزیټ ترلاسه کېدونکی عاید به د افغانستان په بیا رغولو کې ډېره مرسته وکړي.»
د هرات اوسېدونکی امین الله وايي: « زموږ ډېر ځوانان وزګار دي او له دې پروژې سره به که خدای کول په کار شي. دا پروژه هرات او ټولو ولایتونو ته ښې ګټې لري. له اسلامي امارت غوښتنه کوم چې د دې پروژې کارونه نور هم چټک کړي.»
ټاپي پروژه په ټوله کې ۱ زر ۸۱۴ کیلومټره اوږدوالی لري چې د ترکمنستان ګاز به د افغانستان له لارې پاکستان او هندوستان ته ولېږدوي.
ټاکل شوې د یادې پروژې چارې د روان زیږدیز کال تر پایه هرات ښار ته ورسېږي او په رسېدو سره به یې هرات له وارداتي ګاز څخه هم برخمن شي.
