د فراه ولایت ځایي مسوولین وايي، د دې ولایت د بخش آباد اوبو بند رغنیزې چارې ۷۰ سلنه بشپړې شوې او پاتې کارونه په دوو جلا کاري شیفټونو کې ادامه لري.
دوی زیاتوي، د فراه ولایت اوسېدونکو لپاره د دې بند اهمیت ته په کتو، په پلان کې ده چې د رغولو چارې نورې کړندۍ او چټکې شي.
د فراه والي غوث الدین رهبر وايي: « موږ د کارونو په اړه ډاډ ورکوو او دری واړه مسوولین د دې لپاره راغلي یو چې کارونه له نږدې وګورو. بیا هم ژمنه کوو چې دغه کارونه په کومو ادارو پورې اړوند وي، د چټکوالي او بشپړولو په اړه یې انشاالله کوشش کوو چې هغه ادارې په جریان کې واچوو. د پاتې څو سلنه کارونو په اړه هم هڅه کوو هرڅومره ژر چې کېږي، دا کارونه هم بشپړ شي.»
د فراه رود سیندیزې حوزې د مسوولینو په خبره، هرو لسو ورځو کې د یاد بند د چارو له کیفیت څارنه کوي او په کوردننه د امکاناتو د کمښت له امله، ځینې اړین تجهیزات له بهر راوړل کېږي.
د فراه رود سیندیزې حوزې رییس برهان الدین مینه وال وايي: « په تونلونو باندې چې کوم کارونه شروع دي، الحمدالله اوس ښه په چټکۍ روان دي خو دا چې وخت ورته نه دی ټاکل شوی، علت یې دا دی چې کوم مواد دلته کارول کېږي او کوم کار کېږي، ډېر لاس ګیر کارونه دي او دغه راز هغه مواد په افغانستان کې نه لرو چې دلته ترې کار اخیستل کېږي. د موادو انتقالات یو څه وخت نیسي او په سرحدونو کې ځنډېږي. له همدې امله د کار د پای ته رسېدو کره اټکل نه شي کېدای.»
همدارنګه، د دې بند د کیفیت د کنټرول او نظارت مسوولین وايي، له ګول سیخ پرته د پي.سي.سي یا کانکرېټ اچولو او تونلونو بنسټیزې چارې ۱۰۰ سلنه بشپړې شوې دي.
د بخش آباد بند د کیفیت او کنټرول مدیر محمد رفیق نوري وايي: « له سیخ پرته کوم کانکرېټ چې دی، دا سل په سلو کې بشپړ شوی، همدارنګه ګاډرونه هم سل په سلو کې بشپړ شوي، وایر مېش تقریبا ً ۷۰ سلنه بشپړ شوی او شارکېټ ۳۰ سلنه. همدارنګه د تهداب سیخ لرونکی کانکرېټ هم بشپړ شوی او لس سلنه د دېوالونو د سیخ کار په جریان کې دی.»
د مالوماتو له مخې، د بخش آباد بند له بشپړېدو وروسته به دغه بند د ۲۷ میګاواټه برېښنا د تولید او ۱۰۰زره هکټاره کرنیزې ځمکې د خړوبولو ظرفیت ولري.
