د وینځونکو موادو یوه ۲۰ ټني جوپه په لومړي ځل له بلخ ولایت د بریټانیا مرکز لندن ته واستول شوه.
د دې موادو د کارخونې مسوولین وایي، د ۳۰ زره امریکایي ډالرو په ارزښت یې شاوخوا ۲۱ ټنه وینځونکي توکي لندن ته صادر کړل.
دوی زیاتوي، که ملاتړ يې وشي، د صادارتو کچه به يې تر دې هم لوړه شي.
د کارخونې مسوول احسان الله امیني وايي: « نن درېیمه محموله د ۳۰ زرو امریکایي ډالرو په ارزښت ۲۱ ټنه وینځونکي توکي چې د لوښو وینځلو مایع او د جامو وینځلو صابون په کې شامل دي، انګلستان ته صادر شول. لومړۍ جوپه یې اوزبېکستان، دویمه جوپه تاجیکستان او دا دی درېیمه جوپه یې د انګلستان پلازمېنې لندن ته صادرېږي.»
په ورته مهال، مسوولین له هغو صنعت کارانو د ملاتړ ډاډ ورکوي چې کورني تولیدات يې له نړیوالو معیارونو سره برابر دي.
په همدې حال کې خصوصي سکټور د دولت په همکارۍ ټینګار لري او زیاتوي چې د صنعتي ودې لپاره باید ګډ کار وشي.
د بلخ ولایت د صنعت او سوداګرۍ ریس امیر محمد متقي وايي: « لندن ته نه یوازې افغاني محصولات صادرېږي بلکې زموږ د خصوصي سکټور لپاره نوي فصل پرانیستل کېږي. دا ډول نوښتونه د افغان تولیداتو کیفیت او نړیوال معیار پوره کوي.»
د بلخ ولایت د صنایعو او کانونو رییس امام الدین ثنایي زاده وايي: « موږ ځوانان، انرژي، پیسې، معدنونه او زېرمې لرو. موږ باید دا هڅه وکړو او پر خپلو مټو یې ورغوو. موږ باید له چا تمه ونه لرو چې له بهره راشي او زموږ هېواد را ته ودان کړي. دا ۲۰ کاله دلته راغلل، و اوسېدل، خو څه یې وکړل.»
د اقتصادي چارو کارپوهان بیا په دې باور دي، که د هېواد کورني تولیدات همداسې بهرته صادر شي، نه یوازې اقتصاد به ورسره وغوړېږي، بلکې په کوردننه به کاري زمینې هم ایجاد شي.
د اقتصادي چارو کار پوه عبدالنصیر رشتیا وايي: « هر څومره چې صادرات ولرو، په هماغه اندازه کولی شو اقتصادي پرمختګ وکړو او خلکو ته کاري زمینه برابره کړو. په سوداګریزه برخه کې یو څه ډېر مهم دي، هغه دا چې د وطني تولیداتو له لارې ملي هویت ژوندی کېږي.»
دا په داسې حال کې ده چې یاد تولیدات تر دې وړاندې اوزبېکستان او تاجیکستان هېوادونو ته صادرېدل. د تولیدي کارخونې د مسوولینو په خبره، د دوی تولید به د ښه کیفیت په لرلو سره په راتلوونکو کې یو شمېر نورو هېوادونو ته هم صادر شي.
