د کرنې، اوبو لګولو او مالدارۍ وزارت له لوري په کندهار ولایت کې د پنبې پروسېس کوونکو کارخونو لپاره د ملاتړ او مالي اسانتیاوو برابرولو پروګرام پیل شو.
د دغه وزارت مسلکي مرستیال مولوي صدراعظم عثماني د یاد پروګرام د پیل پرمهال وویل، دغه وزارت د ودې او ملاتړ په موخه د کرنیزو توکو د پروسېس صنعتکارانو لپاره مالي اسانتیاوې برابروي او دا پروګرام په کندهار کې پيل شو.
عثماني په دې اړه وايي: « موږ هڅه کوو هغه صنعت تقویه کړو چې د کرنې او مالدارۍ په برخه کې کار کوي. کندهار ته راغلي یو ترڅو د پنبې د پروسېس کارخونو ته قرضه ورکړو. هغوی به په دې قرضې سره خپلې ستونزې هوارې کړي او ورسره به کروندګرو ته هم د کار زمینه برابره شي.»
همدارنګه، د کرني، اوبولګولو او مالدارۍ وزارت د کرنیزې پراختیا صندوق له خوا په کندهار کې ۵۰ میلیونه افغانۍ د پنبې پروسېس کارخونه لرونکو ته د پور په توګه ورکول کیږي.
د دغه صندوق مشر محمد حلیم سهیل وايي، دغه پیسې د کرنیزو توکو د بازار موندنې او ودې په موخه ورکول کېږي.
سهیل زیاتوي: « د پنبې د پروسېس دغه شرکت ته ۵۰ میلیونه افغانۍ مالي تسهیلات ورکول کېږي. په دې پیسو له کروندګرو څخه خامه پنبه پېرل کېږي چې بیا تر پروسېس وروسته ترې پنبه، غوړي او کونجاړه لاس ته راځي. غوړي او پنبه بهرنیو هېوادونو ته صادرېریږي او کونجاړه په داخلي بازار کې پلورل کېږي. دغه مالي تسهیلات بلاعوضه نه دي بلکې په ټاکلې موده کې بېرته اخیستل کېږي.»
د پنبې کروندګر هم له اسلامي امارت څخه غوښتنه کوي چې د کرنیزو محصولاتو د پلور لپاره دې مناسب بازار ورته پيدا کړي.
کروندګر جان محمد وايي: «موږ خوښ یو چې زموږ پنبه په ښه بیه خرڅه شي او نړیوالو بازارونو ته ورسېږي. که چېرې کارخانې زموږ پنبه په ښه بیه واخلي، دا کروندګرو ته ډېره ګټه رسوي.»
د پنبې یو بل کروندګرمحمد ولي وايي: «موږ خپله راټوله کړې پنبه له لرې ځایونو څخه په ټراکټورونو کې تر دې ځایه راوړو او تمه لرو چې په ښه بیه خرڅه شي. که په ښه بیه خرڅه نه شي، موږ خپل لګښتونه نه شو پوره کولی.»
د کرني، اوبو لګولو او مالدارۍ وزارت د چارواکو په خبره، تر اوسه پورې د کرنیز پراختيايي صندوق له خوا د کرنې د ودې او ملاتړ په موخه څه باندې ١٤ ميليارده افغانۍ د کرنیزو توکو د پروسېس صنعتکارانو ته پور ورکړل شوې دي.
