د پاکستان دولتي بانک د تېرو ۱۰ میاشتو راپور موندنې ښيي، چې له افغانستانه دغه هېواد ته د صادراتو کچه نږدې نیمايي ته راټیټه شوې.
د راپور له مخې، په دې موده کې له افغانستانه پاکستان ته د صادراتو کچه چې له هغې مخکې نږدې ۱۴ میلیونه ډالره وه، څه باندې ۸ میلیونو ډالرو ته راټیټه شوې؛ خو برعکس له پاکستانه هېواد ته د وارداتو کچه چې څه باندې ۴۳۵ میلیونه ډالره ده؛ د پام وړ بدلون نه دی کړی.
د راپور یوه برخه: «افغانستان ته د صادراتو کچه په تېرو ۱۰ میاشتو کې له ۴۳۵.۹۵۴ میلیونه ډالرو څخه ۴۳۳.۵۶۷ میلیونه ډالرو ته راټیټه شوې چې دا ۰.۵۴سلنه کموالی ښيي. په داسې حال کې چې له دې هېواد څخه د واردوونکو توکو کچه له ۱۳.۹۵۹ میلیونه ډالرو څخه ۷.۳۵۰ میلیونه ډالرو ته راټیټه شوې چې دا ۴۷.۳۴ سلنه د پاموړ بدلون ښيي.»
راپور کې افغانستان د هند، چین او بنګله دیش، مالدیف، سریلانکا او نیپال ترڅنګ د هغو اووه هېوادونو په ډله کې دی چې پاکستان ورته ډېر صادرات کړي.
په راپور کې د ذکرشویو شمېرو له مخې، چین په دې ډله کې د پاکستاني محصولاتو او توکو ترټولو لوی واردوونکی هېواد بلل شوی، چې د دوه نیم میلیارده ډالرو په ارزښت ورته توکي صادرشوي.
د اقتصادي چارو شنونکی اذرخش حافظي وايي: « مخکې پاکستان ته زموږ ثبت شوې او ناثبت شوې سوداګري په ورځ کې ۵ میلیونه ډالره وه چې په ۹۵ سلنه یې واردات و او ۵ سلنه صادرات وو. ثبت شوي او نا ثبت شوي په دې مانا دي، چې موږ یو لړ سرحدي سوداګري درلوده چې د پولې دواړو لوریو قومونو ترمنځ د ګنډو په نوم یادېږي.»
پاکستان ته د افغاني توکو د صادراتو اصلي توکي وچه مېوه او سبزي ده چې له رسېدو سره سم یې د خپلې دودیزې پالیسۍ له مخې، د دې توکو د صادرولو پر وخت تل ستونزې جوړې کړي.
د اقتصادي چارو شنونکي په کور دننه کرنیزو محصولاتو ته د سړو خونو جوړول او ترڅنګ یې پر بدیلو لارو غور له پاکستان سره د دې دوامداره ستونزې یوازینۍ حل لاره ګڼي.
د اقتصادي چارو شنونکی سید مسعود وايي: « زه فکر کوم، د هغوی صادرات پر موږ زیات دي او د سوداګرۍ کچه یې مثبت ده او د پاکستانیانو په مقابل کې د افغانستان د سوداګرۍ کچه منفي ده او ترڅنګ یې پاکستان اوس هم د افغانستان تر ټولو لومړنی بهرنی سوداګریز ملګری ګڼل کېږي.»
دا په داسې حال کې ده، چې همدا روانه میاشت هند د راتلونکو ل۱۰ کلونو لپاره له ایران سره د چابهار بندر د مدیریتي چارو هوکړه لاسلیک کړه، چې له دې سره ښايي هند او نورو هېوادونو ته د افغان محصولاتو د صادراتو په کچه کې د پام وړ بدلون رامنځته شي.
