له څو لسیزو راهیسې ګڼو افغان پانګوالو په ایران او پاکستان کې پانګونې کړې او د ناسم سیاسي او امنیتي وضعیت له کبله یې افغانستان کې پانګونې ته زړه نه ښه کاوه.
خو تازه په پاکستان کې یو شمیر افغانان او پاکستاني پانګوال خپلې پانګې افغانستان ته را انتقالوي.
دغه پانګوال په افغانستان کې د پانګونې په موخه له سرپرست حکومته د منظم مکانیزم رامنځته کولو غوښتنه کوي او وایي، په افغانستان کې د کاري فرصتونو رامنځته کېدو او د پانګوالو د جذب لپاره دې حکومت خپل لومړیتوبونه په ګوته او منظمه تګلاره جوړه کړي.
افغان پانګوال ذبیح الله افغان وايي: « په افغانستان کې د پانګه اچونې او پانګوالو د جذب لپاره د قوانینو شتون اړین دی. د مالیاتو موضوع باید روښانه وي او حکومت په دې کار وکړي چې څنګه د دغو مسایلو لپاره یو سیسټم رامنځته کړي.»
د صنعت او سوداګرۍ وزارت چارواکي پانګوالو او سوداګرو ته د ملاتړ ډاډ ورکوي او وايي، هغو افغان پانګوالو ته اسانتیاوې او معافیتونه برابروي چې په هېواد کې د پانګونې هوډ لري.
د دوی په خبره، اسلامي امارت په بهر کې مېشت افغان پانګوالو د هڅولو لپاره مالیاتي معافیتونه او یو شمېر نورې اسانتیاوې په پام کې نیولې دي.
د سوداګرۍ وزارت ویاند عبدالسلام اخندزاده وايي: « د دې لپاره چې پانګوال او سوداګر وهڅول شي ترڅو په افغانستان کې پانګونه وکړي، یوه کمېټه را ستنو شویو پانګوالو ته د صنعتي پارکونو په جوړولو او ځمکو وېشلو کار کوي. د هغوی د هڅولو لپاره مالیاتي معافیتونه او تشویقي ټکي په پام کې نیول شوي دي.»
ورته مهال، د اقتصادي چارو شنونکي له پاکستانه د افغان پانګوالو راستنېدلو علت پر دوی د پاکستان بېلابېل فشارونه ګني او دغه راز زیاتوي چې اوسمهال د پاکستان پرتله افغانستان د پانګونې لپاره ښه انتخاب دی.
د اقتصادي چارو شنونکی سیلاب سمندر وايي: « دا چې یوشمېر افغان پانګوال غواړي خپلې پانګې له پاکستانه افغانستان ته ولېږدوي، زه یې لامل د پاکستان د حکومت له خوا پر دوی زیات فشار راوړل ګڼم. ځکه د پاکستان حکومت د مهاجرت له نړیوالو قوانینو او بشري حقونو اعلامیې په سرغړونې، پر عامو افغانانو سربېره هلته مېشتو سوداګرو او پانګوالو ته هم سیاسي او اجتماعي خنډونه جوړ کړي دي.»
له پاکستانه د افغان پانګوالو راستنېدو خبره داسې مهال کیږي چې پاکستان ډېر کله د بېلابېلو پلمو او پر ډېورنډ فرضي کرښه د جګړو رامنځته کولو له لارې، تورخم او سپین بولدک ټرانزیتي لارې تړي. سوداګر وايي، هر ځل د دغو لارو په تړل کېدو سره د دواړو هېوادونو سوداګرو او صنعت کارانو ته درانه مالي زیانونه اوړي.
