د پاکستاني طالبانو تحریک(ټي.ټي.پي) له لوري رسنیو ته په استول شوي اختریز پیغام کې د پاکستان حکومت تورن شوی چې د لویدیځو هېوادونو د خوښ ساتلو لپاره یې د افغانستان حکومت سره اړیکې ترینګلې کړې دي.
په دې اختریز پیغام کې د ټي.ټي.پي مشر د پاکستان له لورې افغانستان سره دا ډول پالیسي د خیانت او غدارۍ په مانا بللې او خبرداری یې ورکړی چې دا چلن د اسلام اباد او کابل ترمنځ د اړيکو پر وړاندې جدي ګواښ دی.
د ټي.ټي.پي د اختریز پيغام یوه برخه: « د پاکستان حکومت د خپلو شخصي ګټو ترلاسه کولو او د غربي بادارانو د خوشالولو لپاره د پاکستان ګاونډي مسلمان هېواد افغانستان سره چې کومه پالیسي روانه کړې، دا په هر اعتبار شرعي او عقلي خیانت او غداري ده. که دا پالیسي بدله نه شي، نو د دې بدې اغېزې او اثرات به د دواړو هېوادونو پر خلکو تر ډېرې مودې پورې وي.»
د ټي.ټي.پي مشر د پاکستان سیاسي او اقتصادي وضعیت د خرابېدو لامل د دې هېواد د پوځي واکدارانو شخصي موخې او پلانونه بللي دي.
نوموړي زیاته کړې، دغو ادارو د پاکستان په ۷۸ کلن تاریخ کې د خپلو ګټو لپاره هېڅ کله سیاسي استقلال نه دی غوښتی او نه یې د خلکو لپاره د ډاډمن امنیت هڅه کړې.
د پاکستاني طالبانو مشر ویلي: « د پاکستان پوځي واکداران هېڅکله نه غواړي چې په ملک کې سیاسي استقلال وي، نه غواړي چې په ملک کې امنیتي وضعیت د ډاډ وړ وي، نه غواړي چې ولس په ښه حال او له احتیاجه خلاص وي. دوی همېشه په ګډوډیو کې خپل خیر ویني او د پاکستان ۷۸ کلن تاریخ د دې دلیل دی.»
د ټي.ټي.پي د مشر په پیغام کې دا هم ویل شوی چې د پاکستان حکومت د روژې مبارکې میاشتې په مهال په بلوچستان او خیبرپښتونخوا کې پر دیني علماوو او عامه خلکو بریدونه نه دي درولي او کورونه یې ورته په کنډوالو بدل کړي دي.
په ورته مهال، د بلوڅانو ملي ګوند مشر اختر مېنګل هم پر خپله ټولنیزه اېکس پاڼه د پيغام په خپرولو سره ویلي، د پاکستان حکومت په کوېټه کې د دوی د سوله ییزو لاریونونو مخه نیولې او ټولې لارې یې پر مخ تړلې دي.
مېنګل د بلوچستان په سوله ییزو لاریونونو کې د پاکستان امنیتي ځواکونو له لوري د بلوڅ مېرمنو نېولو ته په غبرګون کې زیاته کړې، د خپلو خویندو خوشې کولو او ملاتړ لپاره به د هېڅ ډول موانعو پروا ونه کړي.
هغه زیاته کړې: « سره له دې چې موږ سوله ییزو لاریونونو ته ژمن یو، خو زموږ د غږ چوپ کولو لپاره د خضدار څخه کوټې ته غځېدلې او ټولې داخلي لارې د کانټينرونو په وسیله بندې شوې دي. انشاالله هېڅ کانټينر او خنډ به زموږ مانع نه شي. نن به بلوڅ ملت یو موټي ودرېږي او نړۍ ته به وښيي چې د بلوڅ ښځو او ماشومانو سپکاوی څه مانا لري.»
د سیاسي چارو کارپوهان د ټي.ټي.پي اختریز پیغام او د بلوڅو سوله ییز لاریونونه هغه حقایق بولي چې د پاکستان حکومت یې د خپلو څو لسیزو ناسمو پالیسو له امله تجربه کوي.
د سیاسي چارو شنونکی اخترمحمد راسخ وايي:« ټي.ټي.پي چې کومې خبرې د پښتنو او بلوڅو د وضعیت په اړه کړې، دا بلکل د تایید وړ، دقیق او پرځای دي. د پاکستان د همدغو کړنو اثرات دي چې پښتانه د جګړو، بدبختیو او وژنو سره لاس په ګرېوان دي.»
د راپورونو له مخې، د بلوڅ ملتپاله غورځنګونو له لوري دغه پراخ سوله ییز لاریونونه د دې لپاره پیل شوي چې د بلوڅانو یووالي غورځنګ د مشرې ماهرنګ بلوڅ په ګډون هغه بلوڅ مېرمنې او سړي د پاکستان له بندخونو خوشې کړي چې پر وروستیو لاریونونو او یا له هغه وړاندې نیول شوي دي.
