د ټولګټو چارو وزارت تخنیکي مرستیال یوې خبرې ناستې ته خبرو کې وايي، دغه وزارت د سړک رغولو او حفظ مراقبت لسګونه پروژې پلې کړې دي چې ځینې بشپړې شوې او د ځینو نورو د رغولو چارې لا هم دوام لري.
عبدالکریم فاتح د خپلو خبرو په دوام زیاتوي، د ۴۳۰ کیلومټرو په اوږدوالي سره د کابل – کندهار لویې لارې د رغولو چارې بشپړې شوې دي او همداراز د کندهار- اروزګان لويې لارې د رغولو چارې هم ۴۴ سلنه مخکې تللې دي.
د فاتح په خبره، د سالنګونو په لویه لار کې ترخپلې ټاکل شوې موخې د سړک رغولو چارې بشپړې شوې او راتلونکي کال کې یې هم د پاتې برخو د رغولو پلانونه شته دي.
فاتح زیاتوي: « د ټولګټو وزارت سږ کال د کابل- کندهار لویې لارې تقریبا ً ۴۳۰ کیلومټره جوړه کړې، لومړی او دویم پوړ اسفالټ یې اچول شوی او درېیم پوړ اسفالټ به یې راتلونکی کال واچول شي. همدارنګه د هېواد یوه بله مهمه لاره چې د سالنګونو لاره ده. ټولګټو وزارت د سږ کال لپاره په پلان کې نیول شوې برخه په ښه کیفیت سره بشپړه کړه.»
په همدې حال کې د دې وزارت چارواکي په ۲۸ ولایتونو کې له ۱۰ زره کیلومټره سړکونو د حفظ او مراقبت خبر ورکوي چې په خبره يې، په دې برخه کې د واورې پاکولو او نورو ورته چارو ترسره کول هم شامل دي.
د ټولګټو چارو وزارت ویاند محمد اشرف حق شناس وايي: « موږ سږ کال د هېواد په ۲۸ ولایتونو کې ۳۰۲ زیانګالو ساحو کې ۷ زره ۵۷۲ کیلومټره سړک د واورو پاکولو په پلان کې نیولی، خو دا خبره یوازې د ژمي لپاره ده. ټولټال ۱۰ زره کیلومټره سړکونه د حفظ او مراقبت لپاره په پلان کې نیول شوي دي.»
په همدې حال کې، د ټولګټو چارو وزارت د کابل غزني او همدا راز د کابل جلال اباد لویو لارو د دویم لین په جوړولو کې هم د پرمختګونو خبر ورکوي او وايي، د دغو سړکونو چارې روانې دي او لګښت یې هم له ټول پلازې ورکول کېږي.
په همدې حال کې د فاریاب او بادغیس ولایتونو ترمنځ د غځېدلي حقلوي سړک د پاتې ۲۵ کیلومټرو رغولو په موخه د ټولګټو چارو وزارت او یوه خصوصي شرکت ترمنځ د څه باندې ۱.۴میلیارده افغانیو په ارزښت تړون هم لاسلیک شو.
