د ټولګټو وزارت چارواکي وايي، تېر ۱۴۰۳ لمریز کال په ټول هېواد کې پر ۱۹۸ پراختیايي پروژو کار پيل شو چې ډېرې یې بشپړې او ګټه اخیستنې ته وسپارل شوې.
د دې وزارت ویاند محمد اشرف حق شناس وايي، په دې پروژه کې له سړکونو جوړولو سربېره د اورګاډي پټلۍ، د جوماتونو، پلونو او پلچکونو جوړول، د سړکونو پاکول او د ټرافیکي نښو نښلول شامل دي.
حق شناس د کابل – کندهار لويې لارې په ګډون د سړکونو او اوسپنې پټلۍ د جوړولو او ترميم په برخه کې د ٥٤ پروژو د کارونو مخکې تګ خبر ورکوي.
هغه په دې اړه وايي:« د ټولګټو وزارت په تېر ۱۴۰۳ هجري لمریز کال کې د ۱۹۸ رغنیزو او ترمیماتي پروژو کارونه پيل کړل چې ۵۴ یې د سړکونو او اوسپنې پټلۍ، ۴۳ یې د سړکونو د ستانې او څارنې، ۱۶ د ټرافیکي نښو لګولو، ۱۴ د جوماتونو جوړولو، ۱۴ د واورو پاکولو او ۶۰ پروژې هم د اجناسو د تدارکاتو په برخه کې دي. د دغو پروژو له ډلې د ډېرو کارونه بشپړ شوي او د پاتې نورو په چټکۍ سره روان دي.»
په ورته وخت کې د اقتصادي چارو کارپوهان په هېواد کې د پرمختګ او معیاري کېدو لپاره د دغو پروژ پلي مهم بولي او زیاتوي چې د دغو پروژو له بشپړېدو سره به له ګاونډیو هېوادونو سره د سوداګرۍ او ټرانزیټ په برخه کې اسانتیاوې او خلکو ته د کار فرصتونه برابر شي.
د اقتصادي چارو شنونکی نور الله عزیز وايي: « هره پروژه چې په حرکت راوستل کېږي یا پلې کېږي، په پایله کې یې د کار ګومارنې او کارموندنې شاهدان یو. همدارنګه دغه پروژې د هېواد اقتصادي زېربناوې رغوي او کله چې اقتصادي زېربناوې جوړې شي، موږ به د لا ډېرې پانګونې د جذب لیدونکي یو. هر هغه هېواد چې غوره اقتصادي زېربناوې ولري، په کې پانګونو ته لېوالتیا ډېره وي.»
د اقتصادي چارو شنونکی عبدالنصیر رشتیا وايي: « زما په اند، په پراختیايي برخه کې ټولې پانګونې او د یوه ثابت پلان له مخې د پروژو پلي کول، اوږد مهاله اغېز لري. دغه پروژې نه یوازې په لنډمهال کې خلکو ته د کار فرصتونه برابروي بلکې په اوږدمهال کې د نورو پروژو له پلي کېدو او پیل کېدو سره مرسته کوي.»
دا په داسې حال کې ده چې د ټولګټو وزارت په ١٤٠٢ کال کې هم په هېواد کې د ١١٠ پراختيايي پروژو د پيل خبر ورکړى و چې د مسوولینو په خبره، د دغو پروژو چارې په ١٤٠٣ کال کې بشپړې شوې او ګټه اخیستنې ته سپارل شوې دي.
