هلمند چې د هېواد له مهمو کرنیزو او مالداره ولایتونو څخه شمېرل کېږي، په وروستیو کلونو کې په کې د شیدو تولید د پام وړ زیات شوی.
د کرنې، اوبو لګولو او مالدارۍ ریاست مسوولین وایي، په دې ولایت کې هره ورځ نږدې اویا زره لېټره شیدې تولیدیږي چې د مالدارۍ د پراختیا او د شیدو ورکوونکو څارویو د شمېر د زیاتوالي پایله ده.
د مسوولینو په خبره، د شیدو د تولید زیاتوالي د مالدارانو عواید هم زیات کړي او د کورنیو د اقتصادي وضعیت په ښه کېدو کې یې مهم رول لوبولی.
د کرنې ریاست د مالدارۍ مدیر محمدالله منلی وايي: « د هلمند ولایت فارمونه او عام خلک شاوخوا له ۶۰ تر ۷۰ زره لېټرو شیدې تولیدوي. دغه شیدې پر هلمند سربېره کندهار ولایت ته هم ځي او دلته هلمند کې په صنعتي فابریکو کې هم پروسېس کېږي. دغه کار زموږ د فارم لرونکو او څاروي روزونکو لپاره ډېره ګټه لري.»
په هلمند کې د شیدو د پروسېس څو کارخونې هم فعالیت کوي چې هره ورځ شاوخوا دېرش زره لېټره شیدې راټولوي، پروسېس کوي او بیا یې د هلمند ترڅنګ، نورو سیمو بازارونو ته هم وړاندې کوي.
د دغو فابریکو فعالیت د شیدو د ضایع کېدو مخه نیولې او د کورنیو تولیداتو لپاره یې د بازار موندنې زمینه هم برابره کړې ده.
د یوې تولیدي فابریکې مسوول اصف نورزی وايي: « زموږ کارخونه د پنځوس ټنه شیدو د راټولولو ظرفیت لري او له ۸ تر ۱۰ قلمو لبنیات تولیدوو. په دې کې مستې، فرني، شیرپېره، قیماق او نور شامل دي.»
د تولیدي فابریکې کارمند فرید احمد وايي: « زموږ تولیدات سل په سلو کې طبیعي تولیدات دي او خپله دلته په هلمند ولایت کې پروسېس کېږي. زموږ د تولیداتو کیفیت تر نورو هېوادونو ښه دی، ښه خوند او ذایقه لري.»
بله خوا، مالداران وايي سره له دې چې د شیدو تولید زیات شوی، خو د شیدو بیې ټیټې دي او د حیواني خوراک، درملو او نورو اړینو توکو لګښتونه ورځ تر بلې لوړېږي او له امله یې د دوی اقتصادي ګټه ډېره کمه شوې ده.
مالدار احسان الله وايي: « د غواګانو خوراکه ډېره ګرانه شوې او زموږ وس پرې نه رسېږي. پخوا به یې څه شیدې کولې، ځکه کونجاړه ارزانه وه، خو اوس چې هغه قېمته شوې او له امله یې د شیدو کچه هم کمه شوې. کومې شیدې چې اوس یې موږ له غواګانو راټولوو، حتا پروړه(وچ واښه) هم نه پرې اخستل کېږي.»
مالداران له اړوندو ادارو غواړي چې د شیدو لپاره مناسب بازارونه رامنځته کړي، د حیواني خوراک بیې راټیټې او د مالدارۍ سکټور د لا ودې لپاره لازمې اسانتیاوې برابرې کړي؛ ترڅو وکولی شي خپل تولیدات نور هم زیات او د هېواد د لبنیاتو اړتیاوې په کور دننه پوره کړي.
