هرات کې د ۶۲ میلیون ډالرو په ارزښت ۱۰ تولیدي کارخونو د اوړو تولید، ماشین الاتو بسته بندۍ، درملو او نورو برخو کې فعالیت پیل کړ. محلي چارواکي وايي، یادو کارخونو کې به شاوخوا ۵۰۰ کسانو ته د کار زمینه هم برابره شي.
د هرات صنایعو او کانونو خونې رییس عبدالناصر امین وايي: « د ټولو لسو شرکتونو پانګونه شاوخوا ۶۲ میلیون ډالره کېږي چې د درملو، طبي سامان آلاتو، غیر الکولي څښاکو، لبنیاتو، خوراکي توکو او فرش د تولیدولو برخې په کې شاملې دي.»
صنعتکاران وایي، په کور دننه د خامو موادو کمښت او بهرنیو هېوادونو څخه د ورته توکو وارداتو یې د تولیدي توکو ځای نیولی او غوښتنه کوي چې پر بهرنیو توکو دې تعرفې لوړي شي.
صنعتکار فواد احمد ودان وايي: « زموږ له ستونزو یوه هم د مشابه جنس واردات دي او غوښتنه کوو چې د اوړو پر وارداتو تعرفه لوړه شي. همدارنګه غوښتنه کوو چې څومره اوړه واردېږی، باید همدومره غنم هم وارد شي. باید تعرفې لوړې شي، ترڅو موږ رقابت وکولی شو.»
صنعتکار نبی الله عظیمي وايي: « هغه مشابه اجناس چې له بهر څخه افغانستان ته واردېږي، له هغو محصولاتونو ارزانه دی چې د افغانستان په داخل کې تولیدېږي. د دې لامل دا چې افغانستان کې د سون توکي ډېر ګران او قېمته دي.»
بله خوا، مسوولان ډاډ ورکوي چې په کور دننه د پانګونې لپاره زمینه برابره شوې او له پانګوالو غواړي چې د بهرنیو هېوادونو په ځای په کور دننه پانګونه وکړي.
د صنعت او سوداګرۍ وزارت د صنعتي چارو معین احمد الله زاهد وايي: «… راشئ په هېواد کې پانګونې ته بهترین فرصت برابر دی، افغانستان کې پانګونه وکړئ او د خپلې هغې پانګونې ګټه واخلئ چې هم یې ګټه او هم یې پانګه ستا خپله ده.»
هرات والي نور احمد الله اسلام جار وايي: « اوسنۍ نړۍ د رقابت نړۍ ده، اوسنی تجارت په سیمه او نړۍ کې د رقابتونو تجارت دی او نن د ټکنالوژۍ نړۍ ده؛ که زموږ کارخانه او زموږ صنعت له نورو غوره نه وي او موږ یوازې د ګمرک پر تعرفو تکیه وکړو، مخکې نه شو تللی.»
د یادونې وړ ده چې د دې لسو کارخونو له فعالیت پیلولو سره هرات صنعتي ښارګوټي کې د تولیدي کارخونو شمېر ۱۱۷۰ ته لوړ شو.
