Skip to content
د افغانستان روان بشري او اقتصادي وضعیت د مهار په موخه د نړیوال بانک او همدې بانک کې د افغانستان پراختیایي صندوق اداري کمیټې ۷۹۳ میلیونه ډالر تصویب کړي چې ټولې پیسې به د یاد صندوق څخه ورکول کیږي.
دغه پیسې چې د روغتیاخدمتونو، اړینو خوراکي توکو او کاري فرصتونو برخو کې پر لویو پروژو لګول کیږي موخه یې دا ده،چې ښځې او نجونې ترې برخمنې شي.
د یاد بانک له لوري خپره شوېو خبرپاڼه کې ویل شوي،دا پیسې به له افغان بزګرانو سره د کرنیزو محصولاتو په تولید او د خوراکي توکو د خوندیتوب برخو کې مرستې وکړي.
د خبرپاڼې یوه برخه:« د خوړو برخه کې به دا پروژه د اړمنو ماشومانو، معلولینو، دوامداره ناروغانو او هغو ښځو سره مرستې وکړي،چې د کورنیو سرپرستي ور پر غاړې ده. یادو ښځو ته به د کرنې لپاره تخنیکي وسایل، تخم او اړینه روزنه ورکول کیږي. د کورنۍ او روزنې برخه کې به ۱۵۰ زره ښځې وروزل شي.»
نړیوال بانک افغانستان کې د خوړو برخې لپاره ټول ۱۹۵ میلیونه ډالر ځانګړي کړي، چې په دوو پړاوونو کې به ورکړل شي.
د کاري فرصتونو برخه کې ټاکل شوې،چې ۶ نیم زره ټولنو کې د یو میلیون کورنیو لپاره کاري فرصتونو او د پیسو ګټلو زمینه برابره شي.
دې برخې ته ۲۶۵ میلیونه ډالر ځانګړي شوي،چې په دوو پړاوونو کې به ورکول کیږي.
د خبرپاڼې یوه برخه:« په کابل، بامیان، کندهار، کندز، خوست، جلال آباد او مزارشریف ښارونو کې به ۹ اعشاریه ۳ میلیونه کسانو ته د پاکو اوبو، پاکوالي او سړکونو بیا رغولو برخو کې اړین خدمات وړاندې شي. په دې برخه کې به ښځې او د معلولیت لرونکو کسانو لپاره ځانګړې همکاري موجوده وي.»
د روغتایي خدمتونو په برخه کې په پلان کې ده،چې په ۲ زره ۳۰۰ روغتیايي مرکزونو کې د روغتیا، تغذیې او کورونا وبا برخو کې اړینې پروژې پلې شي،چې د نړیوالو او داخلي ادراو لخوا به ترسره کیږي.
د دې برخې لپاره ټولټال ۳۳۳ میلیونه ډالر ځانګړي شوي دي،چې په دوو پړاونو کې به ورکول کیږي.
د خبرپاڼې یوه برخه:« د دغو پروژو په لړ کې به دوه میلیونه ماشومانو ته بشپړ واکسینونه ولګول شي،۱ اعشاریه ۲ میلیونه میندو ته به د زیږون خدمامت وړاندې شي او په ټولنو او روغتیايي مرکزونو کې به د تغذیې کچه لوړه شي. دغه پروژې به په ټوله کې روغتیايي نظام پیاوړی کړي او د ساري ناروغیو برخه کې به د مخنیوي ظرفیت لوړ کړي.»
دا چې دا پیسې د افغانستان پراختیایي صندوق څخه ورکول کیږي،په پام کې ده،چې د دې صندوق مرسته کوونکو هېوادونو ته به فرصت ورکړل شي،ترڅو د یادو پروژو له تطبیق څارنه وکړي.
په یاده څارنه کې به نه یوازې د ښځو ګډون څارل کیږي او بلکې خپلواکو څارونکو ته به هم د څارنې اجازه ورکول کیږي،تر څو ډاډ ورکړل شي،چې د پروژو موخه ترلاسه شوې او که نه.
